Jantokia astelehenetik ostiralera egongo da zabalik, 13:30etik 15:00etara, jaiegunetan eta abuztuan izan ezik. Lehen fase honetan, egunean 25 menu eskainiko dira.
Menu bakoitzaren prezioa erabiltzaile bakoitzaren bizikidetza-unitateko diru- sarreren arabera ezarri da. Gainera, kontsumitutako menuak baino ez dira ordainduko. Egunen batean jantokira joan ezin izanez gero, absentzia jakinarazi eta justifikatu beharko da, menua kobratu ez dadin. Likidazioa hilero egingo da.
Zerbitzua abian jartzea udalerriko adineko pertsonen iritziak eta beharrak jasotzeko egindako lan-prozesu baten emaitza da. Horretarako, galdetegi bat egin da, eta jasotako ekarpenek Laudioko errealitateari erantzun nahi dion proiektua definitzen lagundu dute.
Lehen plaza-esleipenean, bakardadearekin, zaurgarritasunarekin eta mendekotasunarekin lotutako irizpideak hartu dira kontuan, baliabide hau gehien behar dezaketen pertsonei lehentasuna emateko.
Proiektu pilotua denez, zerbitzua abian jartzeak haren funtzionamendua ezagutzeko, bilakaera ebaluatzeko eta etorkizunera begira egon daitezkeen hobekuntzak eta beharrak identifikatzeko aukera emango du.