Ekimen hau Europako eta Euskadiko klima- eta energia-helburuen testuinguruan kokatzen da. Europar Batasunak berotegi-efektuko gasen emisioak gutxitzea eta 2050erako klima-neutraltasuna lortzea du helburu.
Euskadin, otsailaren 8ko 1/2024 Legeak, Trantsizio Energetikoaren eta Klima Aldaketarenak, klima-neutraltasuna gehienez 2050ean lortzeko esparrua ezartzen du, 2045ean lortzeko beharrezko ahaleginak eginez. Legeak, besteak beste, 2030erako berotegi-efektuko gasen emisioak % 45 murriztea, azken energia-kontsumoa gutxienez % 12 murriztea eta azken energia-kontsumoan energia berriztagarrien parte-hartzea gutxienez % 32koa izatea jasotzen du. Halaber, klima-aldaketaren aurrean lurraldearen erresilientzia handitzeko beharra azpimarratzen du.
Herritarren ekarpenak jasotzeko galdetegia
Laudioko Udalak energiaren eta klimaren arloan egindako jardueren artean, udal-eraikin eta instalazioetan, argiteria publikoan eta ibilgailu-flotan egindako hobekuntzak eta herritarrei zuzendutako ekimenak daude, hala nola Laudioko Eguzki Mapa.
Klima eta Energia Plana egiteko prozesuaren barruan, galdetegi bat prestatu da herritarrek energiaren eta klimaren inguruan dituzten iritziak, bizipenak, beharrak eta proposamenak jasotzeko.
Galdetegiaren bidez, besteak beste, udalerriko energia-erabilerari, mugikortasunari, eraikinen egoerari, klima-aldaketaren ondorioei eta ingurumenarekin lotutako kezkei buruzko informazioa bildu nahi da. Ekarpen horiek Laudioko egungo egoeraren diagnostikoa osatzeko eta udalerriaren errealitatera egokitutako neurriak zehazteko erabiliko dira.
Diagnostikoa osatu ondoren, prozesuaren bigarren fasean datozen urteetan Laudiok energiaren eta klimaren arloan eman beharreko pausoak zehaztuko dira.
Lanketa otsailera bitartean egingo da, datu objektiboak eta herritarren ekarpenak oinarri hartuta.
Udalak herritarrak eta udalerriko eragileak prozesuan parte hartzera animatzen ditu, Laudioko Klima eta Energia Plana guztion artean eraikitzeko. Galdetegia azaroaren 2tik 23ra egongo da eskuragarri, online zein hainbat udal-gunetan: udaletxeko sarreran, Kultura Etxean, Aretako Kultura Etxean, Lezeaga Aretoan, Kiroldegian, San Rokezar zentroan eta Santa Ana zentroan.
Ekarpenak egiteko helbideak:
• Euskara: https://forms.gle/mtKNrqPu92mqZVfs5
• Gaztelera: https://forms.gle/1meqqS8nWJ6bT9vw6