Laudioko Udalak dantza-ikuskizun bat eta dokumental baten proiekzioa antolatu ditu giza eskubideen inguruko hausnarketa sustatzeko

Erabiltzailearen aurpegia Laudioko Udala

Laudioko Udalak bi jarduera antolatu ditu datozen egunetarako, giza eskubideen urraketen inguruko hausnarketa sustatzeko.

Alde batetik, NODE dantza-konpainiak «Emakumeak» ikuskizuna eskainiko du, emakumeen eskubideen urraketak eta emakume sahararren errealitatea ardatz hartuta. Bestetik, «Arg(h)itzen» dokumentala proiektatuko da; Nafarroako Sakana eskualdean tortura pairatutako 30 lagunen testigantzak biltzen ditu ikus-entzunezko lanak.

NODE konpainiaren «Emakumeak» dantza-ikuskizuna

Arteak gizarte-errealitateak ikusarazteko eta hausnarketa eragiteko duen gaitasuna abiapuntu hartuta, NODE dantza-konpainia donostiarrak «Emakumeak» ikuskizuna eskainiko du azaroaren 22an, 19:00etan, Kasinoan. Bi emakume dira eszenako protagonistak, ausartak eta erabaki irmokoak, inposatutako eta indarkeriaz markatutako bidaia bat egitera behartuak. Elkarrekin, askatasunerako bidea egiten dute.

Emakume guztien erresilientziari egindako omenaldia da pieza, eta dantzaren eta gorputz-adierazpenaren bidez emakumeen eskubideen urraketak jorratzen ditu,arreta berezia eskainiz  emakume sahararren errealitateari. Artearen lengoaia unibertsalak hitzen beharrik gabe emozioak eta bizipenak transmititzeko aukera ematen du, ikusleen enpatia eta hausnarketa sustatuz.

Azaroaren 26an, «Arg(h)itzen» dokumentalaren proiekzioa

Bestalde, azaroaren 26an, 18:30ean, Kasinoan, «Arg(h)itzen» dokumentala proiektatuko da. Auzolanean egindako ikus-entzunezko lan honek 1966 eta 2011 urteen artean Nafarroako Sakana eskualdean tortura pairatutako 30 lagunen lekukotzak biltzen ditu. Dokumentalak 75 minutuko iraupena du.

Testigantza horiek ezagutzea garrantzitsua da torturaren errealitatea eta haren ondorioak ulertzeko, biktimen bizipenak ikusgarri egiteko eta memoria kolektiboaren eraikuntzan aurrera egiteko.

Bi jarduerek, lengoaia eta ikuspegi desberdinetatik, giza eskubideen urraketen inguruko ezagutza eta sentsibilizazioa sustatzea dute helburu. Izan ere, errealitate horiek ezagutzea, entzutea eta horien inguruan hausnartzea funtsezkoak dira giza eskubideen errespetuan eta defentsan oinarritutako gizartea eraikitzeko. 

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide