Nik eztut Gabriel Aresti poeta ezagutzen, baina irakurri ditut haren salaketak.
Kapela zuridun zerriak kaleak hartzen eta hauetan gailentzen ikusi zituen. «Euskaldun dirudunek izerdia eta bizi-modua zurrupatzen dieten euskaldun langileei» dedikatzen zizkion Arestik bere idatziak, «arbuio eta humiliazio penagarria sufritu» behar zutenei. Euskaldunak euskaldunak zapaltzen ikusten zituela ulertu zuen euskeraz zapaltzea ez dela atseginagoa.
Ez daukat argi eta ez nekike argitzen hizkuntzak berak zer eragin duen gertakarietan. Edozein hizkuntzatan gertatzen denari jartzen diot arreta nik; gertatzen diren gauza asko baititugu salatzeko.
Arestik egin zuen moduan.
------
.
zaindari bat ez ezik
takigrafo bat ere esleitu diote
egiaren alde
esan dezakeen gezurra
takigrafoak galbahetik pasatuko du
ongiaren alde
egin dezakeen gaiztakeria
zaindariak arteztuko du
ezpainak aratz
hortz guztiak
mihia osorik
dauzka
burokraten idazkera ulergaitzaren kontra
bere hizkera ulergaitza
darabil
begirada zikinei
ulertezina zaien
zentzu garbi batekin.
------
lan sistemarako
lan sisteman
hezia izan den umeak
esnatzen denean
zilbor hestea moztuko
sehaskako barroteak apurtuko
loa jaten ematen dion bularrari hozka egingo
aitaren banketxea erreko du
esnatu orduko
ez du jakingo
zer izan nahi duen nagusia denean
esnatuko da jakitean
ez duela nahi izan nagusi ustel bat.