Laudioko EAJren Udal Taldeak emakume alargunek bizi duten egoera salatuko du 27ko udalbatzan. Izan ere, bikotekidea hiltzean gastu asko berberak izaten jarraitzen duten arren, soldata edo jubilazio pentsioaren %52 bakarrik kobratzera pasatzen dira. Espainiako Enplegu eta Gizarte Segurantzaren Ministerioaren arabera, alarguntza pentsioa batez beste 578 eurokoa da. Gauzak horrela, bizitza osoa familia zaintzen eman duten emakume askoren egoera ekonomikoa larria da. Kasu okerrena 15 urte baino gutxiago kotizatu zuten gizonen ezkonkideena da, hauei ez baizaie ezer jasotzeko eskubiderik aitortzen.
Honen guztiarengatik Laudioko EAJk mozioa aurkeztuko du, Udalak Estatuko Gobernuari alarguntza- kontingentzia babesteko eska diezaion, pentsioa errentaren, ordainsariaren edo hildako bikotekidearen pentsioaren %70ra arte zehaztu arte. Gizarte Segurantzaren transferentzia Euskal Autonomia Erkidegora pasa dezala ere eskatu nahi diote mozio horren bidez.
Laudioko PSEk, bere aldetik, enplegu programa eta planen inguruko mozioa aurkeztuko du 27an. Udal Enplegu Mahaia aktibatzea eskatuko du mozio horren bidez, bazterketa soziala izateko arriskua dutenentzat, epe luzeko langabetuentzat eta 50 urte baino goragokoentzat ekimenak bizkortu daitezen.
Era berean, korporazio osoa Sartu eta Lanbiderekin egin diren hitzarmen guztien inguruan informatua egon dadin eskatuko du PSEk, baita enplegu programen onuradunak aukeratzeko irizpideak publiko egin daitezen aukeratuen zerrendak osatu baino lehen.