Laudioko Udal Berdintasun Zerbitzuak Arabako Foru Aldundiarengandik jasotako laguntza 10.263,03 eurotakoa izan da. Alde batetik, herriko ikastetxeetan burutu den sexuaren araberako gizarte rol eta estereotipoak ezabatzeko programara bideratuko da dirua eta, bestetik, oraindik egitekoa den emakumeen aurkako bortizkeriari aurre egiteko programara. Azken hau lehen zein bigarren hezkuntzan gauzatuko da: ipuinak izango dira tresna haur txikienekin eta bikote bortizkeria prebenitzeko tailerrak, berrriz, gaztetxoen kasuan.
Aipatutako programak bakarrik ez, genero bortizkeria pairatzen duten emakumeei arreta eskaintzen dieten langileei (udaltzaingoa, gizarte zerbitzuak eta Hezkuntza, emakume eta gazteria arloko teknikariei) zuzenduriko prestakuntza ere dago ekimen hauen artean. Aurten bi ikastaro ezberdin burutuko dira, biolentziaren biktima diren emakumeengan eskuhartzeko enpatia lantzeari buruzkoa lehenengoa eta kasuen ikuskatzearen ingurukoa bigarrena. Ikastaro hauen bidez emakume eta gizonen berdintasunerako otsailaren 18ko 4/2005eko legeak ezarritako funtzionarioek berdintasun arloan formakuntza jasotzearen beharra beteko da.
Jaietan ere emakume eta gizonen berdintasuna aldarrikatuz
Berdintasun Zerbitzuak eraso sexistak prebenitzeko “Ezetza ezetz da!” lemadun txapak banatu zituen Laudioko Jaietan eta, APILL eta Txosna Batzordearekin batera, “Jaietan ere euskaraz eta berdintasunean bizi” lema zuten 5.000 edalontzi berrerabilgarri banatu zituen txosna zein tabernetan.