Garapenerako Lankidetzarako, guztira, 17.620€ bideratu ditu Laudioko udalak. Zortzi laguntza eskaeratatik hiru onartu dira. Batetik, Kolonbian, Bagué-ko haurren eskubide eta betebeharretako heziketara 8.133 euro bideratuko dira. Bestetik, Indian, Anantapur-en nekazaritza sistema eraginkor eta jasangarriak sustatzeko 7.200 euro erabiliko dira eta Keniako Kibera-Nairobiko umeek Haur Hezkuntza izan dezaten 2.287€ .
Laudioko herria El Aaiun-eko Bucraa dairarekin eta Nikaraguako Somoto herriarekin senidetuta dago, eta bertan proiektuak aurrera eramateko dirulaguntzak eman ditu: 11.000€ Bucraarako eta 9.274,82€ Somotorako.
Bestalde, udala euskal erakunde kooperanteen eta Euskal Fondoaren parte deh heinean 3.482€ ordaindu zituen 2003an partaidetza kuota gisa. Honen bidez, hainbat herrialdetan banatzen da lankidetza: Mendebaldeko Saharan eta Nikaraguan, Kolombian (9.037€), Indian (8.000€), Kenian (4.335€), Errusian (860€) eta Ukraina (403€).
Azken bi herrialde hauetatik hamabigarren urtea da udako oporretarako haurrak jasotzen direna, joan den udan lau pertsona etorri zirelarik. Bikarte elkartearen bidez hiru haur etorri ziren Errusiatik, eta Chernobileko Umeak elkartearen bidez, berriz, Ukrainako haur batek igaro zuen uda Laudion.
Elkartasun azoka
Era berean, Ongizate, Lankidetza eta Osasun arloak Laudioko VI. Azoka Solidarioa prestatzea bultzatu zuen. Urriaren 23an ospatu zen eta Araba eta Bizkaiko 11 elkartek parte hartu zuten, baita Arabako GKE Koordinatzaileak eta Laudio BHIk ere. Guztira, sei tailer antolatu ziren, herrian bizi diren etorkinek koordinatu zituztenak. Herritarren, eta batez ere eskolen, partaidetza esanguratsua izan zen.