Udalak Ongizate Arloaren memoria aurkeztu zuen ostegunean, eta erabilitako diruaren helburu ezberdinak azaldu zituen.
Txari Baladok azaldu zuenez, Udalak hiru Gizarteratzeko Programa ezberdin ditu martxan.
- Gizarte Larrialdietarako Laguntza Prorama: hau jasotzeko beharrezkoa da 18 urteak beteta izatea, Laudion erroldatuta egotea, aurreko sei hilabetetan E.A.E.ko edozein udalerritan erroldatuta egon izana eta nahikoa baliabiderik ez izatea onarrizko beharrak eskuratzeko. 2012. urtean 92 familiak jaso zuten laguntza hau, biztanlegoaren %0,95ak hain zuzen.
- Babesgabeko pertsona eta familientzako Udal Programa: honen barruan hainbat arrazoi ezberdinetarako laguntzak ematen dira (adingabekoen babesgabetasuna, drogamenpekotasunak, tratu txarrak...). Guztira, 87 pertsonek jaso zuten laguntza hau.
- Elikagaien programa: hau aurrera eramateko, Arabako Elikagaien Bankuarekin elkarlanean dihardute, eta janari banaketan Laudioko alargunen elkarteko bolondresak, bankuko erabiltzaileak eta komunitatearen onurarako lanak egiten dituzten pertsonak dira elikagaiak banatzen dituztenak. 2012an 248 familiak (guztira 706 pertsona) jaso zuten laguntza hau.
Guztira, 191 familiak jaso zuten hauetako laguntzaren bat 2012an, eta 150.000€ erabili ziren horretarako.