Amets egiten dut batzuetan. Gorputzak aske izango diren mundu batekin, eta heteroarauen gainetik emakumeon* gorputzak menperatzeko joerarik egongo ez den munduarekin egiten dut amets. Urte amaierarekin batera, Argentinatik iritsi diren albisteak pozez jaso ditugun arren, tupust egin eta errealitatera itzultzen gara bat-batean zure hitzekin.
Lotsagarriak eta mingarriak dira zure hitzok. Topa egiten duzun aldiro handitzen den aparraren harrotasun berarekin esaten dituzun hitz horiek. “Anda que la X, está mejor que yo”, “está como la cena de Navidad”, “cómo se ha puesto”, “pingo”, eta “zorra”. Ez naiz isiltzen, eta ez naiz esandakoa ezkutatzen arituko. Hauek eta gehiago entzun beharrak lotsa ematen dit, nazka, amorrua. Nor zara zu emakume baten gorputza publikoan epaitzeko? Nor zara zu zer jantzi eta erantzi behar duen esateko? Eta nor erabiltzen dituzun hitzekin inor iraintzeko?
Laudioko pertsona publiko bat izanik eta ehundaka jarraitzaile dituen sare sozialetako kontuetatik adierazten dituzunak bezalakoak esateak, benetan larria den zerbait dela uste dut. Ez nuke esan gabe utzi nahi zurea bezain salatzekoa eta kezkagarria iruditzen zaidala jarraitzaile dituzun guztien jarrera, baita honelako ekintzen aurrean isiltzen diren konplize guztiena ere.
Are gehiago, zuk “Gora Laudio” esatearekin batera zera datorkit burura: nik ez dudala emakumeak apaingarri balira bezala baliatzen dituen herrian bizi nahi, ezta inor atzean geratzen bada “que se joda” esango duen jendartearen parte izan nahi ere. Dena den, egia esan behar badut, lotsagarria baino, beste hitz batekin definituko nuke argitaratutakoa: kutrea.
Ez dakit hau irakurriko duzun, ezta zure jarrerak aldatzeko balio izango duen ere. Baina argi izan gure gorputzen gaineko kontrola hartu nahi duzuen aldiro edota piropo matxista bezain misoginoekin ahoa betetzen duzuen bakoitzean, aurrean izango garela. Amets egiten dugun bezala, borrokan jarraituko dugulako, gorputz askeen herria eraikitzeraino.
GORA GORPUTZ ASKEAK! GORA BORROKA FEMINISTA!