Prentsa ohar baten bitartez Laudioko EAJk salatu berri du udal gobernu taldea “ezikusiarena” egiten ari omen dela udal-eraikinen garbiketan diharduten langileen lan-gatazkari dagokionez. Izan ere, eraikin hauen garbiketarako udalak kontratatua duen enpresak urtebete darama bere langileei soldata ordaintzeko atzerapenetan eta, hori gutxi balitz, garbitzaileek lau hilabete daramate kobratu barik. Bestalde, EAJk salatu du udalak, arazo hauen jakitun, orain arte atzerapenik gabe ordaindu diola enpresa honi bere zerbitzuengatik. Era berean, jeltzaleek euren burua goraipatu dute euren eskariz udalak enpresari ez ordaintzea erabaki duelako honek bere langileei ordaindu diela egiaztatu ezean.
Udal gobernuak lau urterako kontratua izenpetu zuen enpresa honekin 96.800 euroren truke (BEZa gehituta 111.000 eurotik gora). EAJk salatu du udalak ez zituela kontuan hartu aurreko legealdietan zehar (Jon Karla Menoioren agintaldian) enpresa horrek emandako arazoak ez eta enpresa horrekiko langileek zituzten ezinikusiak ere.
Gauzak horrela EAJk zera exijitu dio udal gobernuari: udalaren menpeko eraikinen garbiketa zerbitzuen mantentzea eta langileen eskubideen defentsa.