Larunbat honetan, abenduak 1, “Euskaraz bizi nahi dugu” lelopean manifestazioa deitu du Kontseiluak Donostian egun euskarak bizi duen egoera salatzeko asmoz. Manifestaldi honetara joateko deia beste hainbat erakunde eta gizarte eragilek ere luzatu izan dute. AEKk Donostiara joan nahi dutenentzako autobus bat jarri du Laudion (izena emateko ohiko lekuetara jo). Izan ere, eragileok adierazi dute gure hizkuntzaren egoera ez dela makala, batez ere Araba bezalako herrialdeetan.
Izan ere, Arabako Foru Aldundiak era nabarmenean murriztu ditu datorren urteari begira euskarari ematen zaizkion dirulaguntzak, %51,7 zehazki 2012ko aurrekontuarekin konparatzen baldin badugu. Izatez, foru gobernuan aldaketa egon zenetik euskarari zuzendutako dirulaguntzak %66an izan dira murriztuak; Xabier Agirreren gobernuak 1.465.639 euro eman baldin bazituen 2010ean kantitate hori 496.500koa izango da datorren urtean.
Neurri hauek ondorio lazgarriak ekarriko dituzte Araban euskararen normalkuntzan dihardutenentzat. Besteak beste, 2009an martxan jarritako kuadrilletako euskara teknikarien egitasmoa bertan behera utziko da, zeinak eskualde eta udalerrietan hizkuntza honen normalizazioan bide berriak irekitzea helburu baitzuen, De Andrés-ek proiektu honi zihoazkion 233.000 euroko laguntza bertan behera utzi duelako.
Halere, ez da honakoa izango foru administrazioak murriztuko duen kontu bakarra izango, zeren eta, hainbat eta hainbat erakunde ere diru iturri hori gabe geldituko baitira. Horien artean Geu Gasteiz, EHUren Eusko Iker Fundazioa, Arabako Merkataritza Ganberak euskararen sustapenerako sorturiko funtsa… eta abar eta abar. Hala ere, ez da honakoa De Andrés-en gobernuak burutu izan duen lehen diru murrizketa aspektu honi begira, aurtengo aurrekontuetatik Herri Urrats, Nafarroa Oinez eta Euskara Elkarteen Topagunean diruz hornitzera bideraturiko laguntzak ere hutsean gelditu baitira, baita euskararen erabilera sustatu eta ikaskuntza zein sentsibilizazio programetara bideraturiko babesa ere 170.000 eurotan murriztu zuen foru gobernu popularrak.
Eusko Ikaskuntza, Euskaltzaindiak, Arabako Bertsozale Elkarteak, Euskararen Aholku Batzordeak, euskarazko argitalpenek… murrizketa nabarmenak jaso izan dituzte ere.
Dena delarik ere, murrizketa hauek are nabarmengarriagoak dira aldundiak egindako bestelako dirulaguntzen urritzeekin konparatzen hasten garenean. Azken bi urteotan aldundiak %24 murriztu ditu bere gastuak, 524,4 milioi eurotik 397,7ra pasaz; Euskara, Kultura eta Kirol Sailak guztira %16,9ko murrizketa bat jaso du. Gainetiko begirada azkar bat aski da jakiteko murriztapen hauek oso txiki geratzen direla euskarak jaso duen artazi kolpearekin konparatzen baldin badugu, gogora dezagun: %66.
Erabaki hauek guztiek hautsak harrotu dituzte zenbait esparrutan, euskararen munduan zeresanik ez dago. Aiaraldea.com-ek Aiara eskualdeko lehendakari den EAJko Mikel Lasarekin hitz egiteko beta izan du, honek oso era negatiboan baloratu izan du De Andrés popularraren gobernuaren erabakia eta, baita ere, eskualdeko euskara teknikariei zihoazkien diru laguntzak bertan behera utzi izanagatik emendakina aurkeztuko dutela adierazi izan du erabakia baliogabetze aldera.