Ramón de Urquijo enpresa arazo ekonomikoekin dabil. Izan ere, Repsolek butanoa banatzeko baimena kendu berri dio, porrot osoa ekarriaz. Enpresa hartzekodunen konkurtsoan sartu da eta kaleratzeak iragarri ditu. Bienbitartean, langileek otsailetik dirurik jaso ez dutela salatu dute.
Eskualdeko UGT sindikatuko ordezkari batek jakinarazi du enpresak eskualdean dituen 28 langileetatik bi administratibo, butano banatzaile bat eta beste langile bat kaleratu nahi dituela. Dirua zor zaien langileek, bestalde, lehen bailehen alde egin nahi dutela enpresatik diote, hartzekodunen leihaketaren ostean enpresa hartuko duenak zorraren osotasuna ordainduko ez dielakoan.
Baina ez da honakoa, arazoak pairatzen dabilen enpresa bakarra. Bailarako industriak eta, batez ere, langile industrialek bizi duten egoerak zeresan nabariak sortu ditu erakunde ezberdinengan. Ezker Anitzak, adibidez, Guardian enpresako langileek zuzendaritzarengandik azkenaldian jaso izan duten “xantaia” salatu berri du, Isabel Salud legebiltzarrerako hautagaiak adierazi zuenez: “Onartezina da jarduteko era hau, patronala harropuzkeriaz jokatzen ari da eurei boterea ematen dieten indar politiko handiek aurrera atera dituzten azken bi lan erreformak kausa”. Bestalde, talde federalistako kideek adierazi dute Arabak bere ekoizpen sektorearen desegintza bizi duela egun, 200 enpresa baino gehiagok itxi dute dagoeneko, lan erreformen eta kreditu ezaren ondorioz.
Gaur bertan Udalak Guardian enpresako langileen aferaren inguruko mozio bat aztertuko du ezohiko bilkura baten bitartez.