Ugarte auzoko bizilagunek urteak daramatzate Okondotik Laudiora bidean Sagasti eta Isasirantz pasatzeko dagoen bihurgunean igarotzeko sortzen diren arazoengatik kexu. Horri konponbide bat topatu nahian, udalak bihurgune hartan errotonda egitea erabaki du. Horretarako, “Españica” deritzon etxea bota beharko du. Hasiera batean etxea ez botatzea pentsatu izan den arren, udalak ondorioztatu du, hala, errotonda txikiegia aterako omen zela eta ez zirela bilaturiko helburuak lortuko. Haatik, bertako bizilagunak berlojatzeko lekuen proposamenak jasotzen hasi dira dagoeneko, etxe berria Baia eta Zumalakarregi kaleen arteko izkinan edota Aldaikoerreka plazako soilgunean eraikiko da, baina oraindik ez dago argi noiz izango den hori.
Lan honek 2,3 milioi euroko kostua ekarriko dio Laudiori, prezioaren barruan lana bera eta espropiaziotik eratorritako gastu guztiak kontuan hartuta. Obrak bost bat hilabetez luzatuko diren aurreikuspenak plazaratu ditu udalak.
Errotonda berriak hiru irteera izango ditu Laudiotik goazelarik: bata Okondorantz, bestea Sagasti eta Isasi auzoetarantz eta azkena “Envases” enpresara sartzeko. Bestalde, eta beste kontu batzuei loturik, Ugarteko bizilagunek Leziagako errepidea bide bakarrekoa egitea eskatu dute, estuegia izateagatik eta bazterretan hainbat zulo edukitzeagatik.