Laudion ospatuko den Euskal Kirolaren eguna aurkeztu dute

Datorren igandean, urriak 24, Euskal Kirolaren Eguna ospatuko da Laudion. Euskal Kirol Federakundeen Batasunak Aiaraldeko herri horretan egingo du, esan bezala, ekintza horren zazpigarren edizioa, lehenago, besteak beste Bilbotik, Amurriotik, Tolosatik edota Arrigorriagatik pasatu ostean. Gaur bertan bildu dira udaletxean EKFBko kideak, euren artean Rafael Munilla zegoela, Jon Karla Menoio alkatea eta hainbat erakundetako ordezkariak, egitekoa den jardunaldiaren aurkezpena egitearren. Eurek esandakoaren arabera, jarduerak asteburu guztian egingo diren arren, igandea izango da egunik mamitsuena, izan ere, orduan egingo dira ekintza gehienak, horietako lehena eguerdiko ordu batean izango den inaugurazio ofiziala. Une horretan monolito bat jarriko dute Granja kiroldegiko sarreran, egun hau gogoratzeko, besteak beste, Juan Jose Ibarretxe lehendakariaren (federakundearen sortzailea) eta EKFBko ordezkarien presentziarekin. Momentu horretatik aurrera emango zaie hasiera ekimenei. Ekimenak askotarikoak izango dira, betiere kiroldegiko ahalmenetara egokiturik. Bi motatako jarduerak egingo dira: alde batetik kirol norgehiagoka irekiak, edonork parte har dezan (xakea, hipika, saskibaloia, pilota, eskalada...) eta, bestalde, kirol erakustaldiak (piraguismoa, squasha, judoa...). Granja kiroldegiaz aparte Aldaikoerreka plazan zenbait erakustaldiz gozatzeko beta ere izango da, hala nola, halterofilia, triala edota hockeya.

Antolatzaileek esan dutenez, eguna jai-giroan ospatuko da, baina euskal kirola sustatu eta ondo pasatzearekin batera aldarrikapena ere luzatu nahi da, euskal federazioen nazioarteko ofizialtasuna, hain zuzen ere. Helburu hori oztopo politiko guztien gainetik lortu behar dela esan du Munilla jaunak, “selekzioak kirol alorrekoak dira betiere, eta ez politikoak. Askok ez dute hau ulertzen, ordea.”