Azkeneko urteotan ohitura bihurtu den bezala, iragan igandean laudioarrek Erroketxu txakurra erre zuten herriko jaiei amaiera emanez. Laudion aski ezaguna den Erroketxu gaueko hamaika eta erdiak aldera irten zen, koadriletako kideen bizkar gainean. Institutu ondotik eta Zumalakarregi etorbidetik ibilalditxoa egin ostean plazara sartu zen Pio XII. kalean barna. Bertan, zenbait lagunek kanta berri bat abestu zuten txakurraren omenetan.
Erroketxu txakurra berriz uzten gaituzu,
urrun zaren artean gogatuko zaitugu.
Ez da negar izpirik gure begietan
datorren abuztuan zarelako bueltan.
Kantaldiak irauten zuen bitartean, urtero lez, Erroketxu sutan erre zen bere gainera kandelak botatzen zituzten laudioarren begiradapean. Kantak dioen moduan ez zen pena susmorik sumatu ahal izan laudioarrek ongi badakitelako hurrengo abuztuaren 15ean huts egin ezinezko zita daukatela Herriko Plazan jaiei berriz hasiera emateko.
Argazki-bildumaren egilea: Javi Tomé
Argazki-galeria ikusteko klikatu hemen: http://www.flickr.com/photos/aiaraldea/sets/72157624858174552/show/