Euskadiko gehiengo sindikalak deituriko greba orokorra izan da gaur Hego Euskal Herri osoan. Aiaraldea, noski, ez da salbuespena izan. Goizeko bost eta erdietatik hasita langileek piketeak antolatu izan dituzte Amurrioko industrialdeetan. Informazio taldeen hurrengo geldiunea Murgako industrialdea izan da eta, horren ostean, Laudiora pasatu dira, eta Lamuzako Eroski denda ixtea lortu dute. Bertan, langile bat gutxienez Ertzaintzak identifikatu du. Ibilbidea bukatutakoan parte hartzaileetako askok Bilbora jo dute bertan deitua zegoen manifestaldi nazionalean parte hartzearren.
Hurrengo zita Laudion zen, berriz ere. Bertan Aiaraldeko hainbat herritatik iritsitako ehundaka pertsona bildu dira seietatik aurrera herriko kaleak zeharkatu dituen manifestaldira. Basta ya de inposiciones, gure eskubideak defendatu ditzagun lelopean buruturiko mobilizazio honek, herri sustengu ikaragarriaz gain, tentsio uneak ere bizi izan ditu Ertzainako hainbat kiderekin; horietako bat Gastronomi Museoaren alboan izan da, gazte batzuk taberna batean sartu direnean jabea grebaren jakinaren gainean jartzeko asmoz.
Grebak jarraipen zabala izan du Aiaraldean; Amurrio zein Laudioko industrialdeetako enpresa handi gehienek itxi behar izan dute lan esku falta dela eta, giroa antzekoa izan da herrietako lokal gehienetan. Garraio publikoak eta Osakidetzak zerbitzu minimoekin jardun izan dute, halere, egun guztian zehar.