Esan bezala, arratsalde historikoa bizi izan zuen gure taldeak larunbatean Erreforreko zelaian. Ligako lehen entseguak lortzeaz gain (konkretuki 4, erasoko bonusa eskuratuz), sailkapenerako lehenengoko puntuak lortu zituen gure eskualdeko taldeak, Gaztedi talde Gasteiztarraren aurkako partidan 24 puntutara berdinduta. Honela, taldeak 3 puntu lortu zituen sailkapen nagusirako.
Partidua oso berdindua izan zen jokoari dagokionez, gasteiztarrek kontaktua bilatzen zuten etengabe (beraien aurrelariek zuten pisu nagusitasuna aprobetxatu nahian) eta gureak joko horretan erori ziren. Horrela izanda, 1-3 entsegutako partzialarekin bukatu zen lehen zatia kanpokoen alde. Gureen entsegua Daviden eskutik etorri zen, berriz ere jokalari beteranoaren inteligentziaren erakustaldia gauzatuz.
Bigarren zatia hasita, partida hasieran gasteiztarrek zuten pisu abantaila desabantaila bilakatzen joan zen, nekea handitzen zen heinean. Bestalde, gure mutilek ez zuten erritmoa eta intentsitatea momentu bakar batean ere jaitsi, aldeko 3-1eko partziala lortuz bigarren zatian. Bigarren zatiko entseguak Gotzonen (maul bat egiteko ahaleginaren ostean eginikoa), Jonguiren (jokaldi indibidual baten ondorioz) eta Mendiguren txikiaren (Julenekin batera gauzatutako jokaldi politaren emaitza gisa) eskutik heldu ziren.
Aipagarria da, lehenengoko aldiz denboraldi osoan zehar taldea intentsitatea eta defentsa ordena mantentzeko gai izan zela partida osoan. Gogor eta kementsu jokatu zen 80 minutuetan eta orokorrean lekua galdu gabe, honek eman zion etxeko taldeari norgehiagoka lehiatzeko aukera. Hala ere, hobetzeko gauza ugari geratzen zaizkio taldeari. Besteak beste, errugbia inteligentzi gehiagoz jokatzekoa, aurkariaren ezaugarrien arabera jokoa moldatzekoa (esaterako, pisu gehiagoko taldeen aurka kontaktu zuzena etengabe ez bilatzea).
Behin lehen emaitza onak jasota bideari jarraitzeko indarra mantendu beharra dago. Bultza Nerbioi!