Hilabete batzuk igaro dira COVID-19aren ondorioz, estatu burgesek eskubide murrizketa eta urraketa politika hasi zutenetik. Orain berriz ere neurri berriak aplikatu dizkigute, guztiak ere populazioaren kontrola areagotzera bideratuak. Izan ere, oligarkia finantziarioen, politikari profesionalen eta enpresari handien sostengu ekonomiko eta politikoentzako beharrezkoak diren sektore estrategikoak mugatzea ez da haien planetan sartzen; nahiz eta lantegiak eta ikastetxeak izan kutsatzeak gertatzen ari diren guneak nagusiki. Mugikortasuna murrizten digute, etxeratze aginduak ezartzen dizkigute, gure familiengandik isolatzen gaituzte eta kontrol poliziala areagotzen dute, produkzio-zentroak irekita mantentzen dituzten bitartean.
Politikari guztiak ados jarri dira egungo egoera langile klasearen erantzukizun faltagatik dela adieraztean, kapitalaren agente modura, eurak direnean egoera honen erantzule zuzenak. Beraiek dira ustez osasun krisia konpontzen saiatu direnak, baina, euren interes ekonomiko eta politikoen alde egiten dutela argi erakutsi digute. Bitartean, langileria pandemia pairatzera eta kapitalaren krisia ordaintzera kondenatuta dago.
Gure eskubide zibil eta politikoen alde borrokatu behar dugu. Kentzen ari zaizkigun eskubideen alde antolatu eta kapitalaren egungo erasoaldiaren aurrean geure burua defendatzea dagokigu. Soilik klase antolakuntzaren bidez aurre egin ahalko diogu basakeri honi. Horregatik larunbatean, azaroak 28, Aiaraldeko Gazte Koordinadora Sozialistak antolatutako hitzaldira gonbidatzen zaituztegu, arratsaldeko 18:30-tan gaztetxe aurrean.
Burgesiaren zuzeneko diktadura gelditu!