Okondoko Udala xehetasun guztiak amaitzen ari da Suteak Prebenitzeko Udal Plan berriaren aurkezpena eta erakustaldia egiteko, 65 urtetik gorako pertsonen segurtasuna ardatz hartuta. Programa honetan, "SUA"-ren instalazioa nabarmentzen da, Mundo Pua euskal enpresak garatutako sistema berritzailea. Gailu hau etxeko suteen prebentzioan oinarritzen da, etxeko sukaldeetan bereziki, suteak modu eraginkorrean detektatuz eta itzaliz.
Jon Escuza Okondoko alkatea gogotsu agertu da ekimen honengatik, "pertsonen segurtasuna eta ongizatea lehentasunezkoa baita Udalarentzat. Gainera, programa honek suteak prebenitzeaz gain, gure herriko bizi-kalitatea hobetzea ere bilatzen du".
Instalatzeko dirulaguntzen udal-programa
Erabilera errazteko eta bultzatzeko, Udalak dirulaguntzen programa bat garatuko du lau urtez "SUA" instalatzeko, ahalik eta etxebizitza gehien lortzeko helburuarekin. Horrela, Okondo udalerri aitzindaria izango da aukera hau eskaintzean.
"Gure bizilagunen segurtasuna eta lasaitasuna bermatu nahi dugu. Hori dela eta, programa hau ez da soilik prebentzio-neurri bat, baizik eta udalerrian giltzarri den kolektibo honi eskaintzen diogun zaintzan eta arretan aurrera egiteko urrats bat ere bada", azpimarratu du alkateak. "Sistema instalatzeko erraza da, obrarik eta wifi-konexiorik gabe, eta azkar jarduten du suaren hasierako fasean, kalte materialak saihestuz", gaineratu du.
Era berean, "SUA" sistemak arrisku arruntak detekta ditzake, hala nola, sukaldea eta erorikoak gertatzen direnean, aurrez ezarritako telefono-zenbakietara alertak bidaliz, eta, erantzunik ez badago, sistemak zuzenean abisatzen du larrialdietara. Gainera, sukaldeko sua lehen fasean dagoenean jarduten du, azkar itzaliz eta kalte materialik gabe, eta istripu baten ondorioz jarduerarik ez dagoela ere antzeman eta ohartarazi dezake.
"Gazteengandik helduengana hurbiltzea eta gailuak nola funtzionatzen duen lehen pertsonan ikustea nahi dugu, beti dugu hurbilekoren bat, ziur aski behar izango duena, eta konbentzitzeko modurik onena haren funtzionamendua ikustea da"
Jende guztiarentzako programaren aurkezpen ofiziala datorren asteartean, urtarrilak 30, egingo da 18:00etatik aurrera Kultur Etxean eta Julian Iantzi telebistako aurkezle ezagunak parte hartuko du, ekitaldia dinamizatuko duena", bukatu du Jon Escuza alkateak eta aurreratu du eguna lunch txiki batekin amaituko dela bertaratzen direnentzat.