2019ko urtearekin alderatuz gero, alde nabarmena egon da ekainean jasotako bisitari kopuruari dagokionez: 2020an, 473 pertsona eta, 2019an, 1.089. Hala ere, aipatzekoa da pasa den ekainean Bizkaiko eta inguruko herrietako auzokideak baino ezin zirela museora gerturatu.
Gainera, 2019an, eskolako bisitei eta egindako ekintzei esker 520 pertsona inguru hurbildu ziren; azken urte honetan, ordea, ezin izan da aukera hori baliatu.
Uztaila eta abuztua, bestetik, antzekoak izan dira, COVID-19ak eragin duen egoera kontuan harturik. Irailean ere, aldea eskasa izan da, 2019an bi erakusketa egon zirelako.
Jatorriari dagokionez, eta osasun egoera dela eta, ia ez da bisitari atzerritarrik egon. Gehienak EAEkoak eta, batik bat, bizkaitarrak. Espainako Estatutik etorritakoen kasuan, Kataluniako eta Madrilgo turistak nabarmendu daitezke.
Gorbeiako Turismo Bulegotik ere, naturarekin lotutako bisita gidatuak egin dira uda-udazkenean, eta horietako bat Orozkon gauzatu da, Izartzako pagadira, hain zuzen ere. Guztiak COVID-19aren neurriak bermatuta gauzatu dira, eta pozik erantzun dute parte-hartzaileek.
Udazkeneko jardunaldiei dagokienez, Europako Ondareren Jardunaldiek eta 'Orozko inguruan duzun museoa' egitarauak, segurtasun neurrietara egokituta, oso harrera ona izan dute. Eskerrak eman beharra dago hurbildu ziren pertsona guztiei, baldintza zail hauetan kultura lantzen jarraitzeagatik.