Udalbatzak aho batez onartu zuen martxoaren 9an 'Orozkoko Emakumeen eta Gizonen Berdintasunerako III. Plana'. Funtsezko tresna da esku-hartze publiko koordinatua, koherentea eta eraginkorra ahalbidetzeko. Gainera, udal-arlo guztiak inplikatuta daude.
Biztanleria osoak genero-berdintasuna aintzat hartzen duen udalerria eraikitzeko helburuarekin ahalik eta ondoen lan egiteko konpromiso erreala eta esplizitua hartu du udalak. Zazpi urte baino gehiagoz, eskura dituen baliabideak bideratzen eta inbertitzen ari da helburu hori lortzeko.
Berdintasun Zerbitzua 2008an sortu zen Orozkon, eta 2009an onartu zen 2009-2011 urteetarako lehenengo Berdintasun Plana, 2014. urtera arte luzatu zena. Urte horretan, bigarren plana jarri zen martxan eta indarrean egon zen azken hau onartu arte.
Helburu garrantzitsuak lortu dira azken lau urteetan. Hala ere, garrantzi handiko erronkak daude lortzeke: Euskadiko VII. Planean ezartzen diren Berdintasunerako Gobernantzaren helburuak bultzatzen jarraitzea, Berdintasun Zerbitzuak estrategikotzat jotzen dituen proiektuak garatzea eta udal-sailen inplikazio- eta autonomia-maila handitzea ekintza nagusien garapenean.