Askotan, Orozkoko espazio publikoetan ekintza bandalikoak eta gizabidearen kontrako jokabideak antzeman dira: pintaketak, tolestutako zirkulazio-seinaleak, kendutako zakarrontziak, apurtutako zabuak, farolak eta bankuak, etab. Kalteen zerrenda luzea da eta urtero milaka euroko inbertsioa egin behar da konponketetan, garbiketan edo elementuen berriztatzean. Diru hori udaleko diru-kutxatik, eta, finean, herritar guztien poltsikoetatik ateratzen da.
Araudi berria
Arazoari aurre egiteko, Udalak kontzientziazio kanpaina batetik harago joan nahi du, eta ordenantza berri bat prestatuko du. Horren bitartez, jokabide hauek isunen bidez zuzentzeaz gain, espazio publikoa osatzen duten elementuen zaintza eta babesa balioan jarri nahi ditu, orozkoar guztion ondarea dena. Horretarako, partaidetza-prozesu bat irekiko da orain, herritar guztiek ekarpenak egin ditzaten edo beren iradokizunak, ideiak eta proposamenak helaraz ditzaten eta araudian jaso daitezen.
Interesdunek partehartzea.orozko@hotmail.com helbidera mezu bat igor dezakete edo Udal Erregistroan idatzi bat entregatu euren ekarpenekin. Horretarako epea maiatzaren 20ra bitarte egongo da zabalik.