Antolinzaleak Jai Batzordeak egingo duen balorazio ofizialaren zain, Pedro Mari Intxaurraga alkateak Orozkoko jaien inguruko lehen balantzea egin du. Parte-hartze handia eta giro ona izan dira bost jaiegunen ezaugarri nagusiak.
Intxaurragak positibotzat jo ditu jaiak, egon den giro onagatik zein gauzatutako ekitaldietan izandako jende andanagatik. "Hiru bazkari herrikoi antolatu ditugu, haurrena, erretiratuena eta Berakatz Egunekoa, eta jende asko etorri da; Berakatz Egunean, 500 pertsona", azpimarratu du alkateak. Hain zuzen ere, aurtengoa hirugarren aldia izan da zeinetan Berakatz Eguneko herri bazkariko txartelak agortu diren.
Parte-hartze altua
Egunik jendetsuenak San Antolin Eguna eta asteburukoak izan ziren. Arrakasta handiko ekitaldien artean, zekorketak, kontzertuak, lehiaketak eta erromeriak izan dira pertsona gehien erakarri duten ekintzak, alkateak azalduta. Izan ere, aurten mota askotako lehiaketetan parte hartzeko aukera izan dute herritarrek, besteak beste, garrafa lehiaketan, aire libreko pintura lehiaketan eta mozorro lehiaketan. Musika emanaldiei dagokienez, Trikidantz eta Akerbeltz erromeriak, Boikot, Suaia & Dub Akustik, Stepi Selektah, The Van, Hilean Bariku Bat eta Akatz taldeak zein Dj Markelin, Dj Kubabilly, Dj Uxun & Tatun, Dj The Andras eta Dj Oihan Vega airtu dira jaiak erritmoaz girotzen.
Erasorik gabeko jaiak
Intxaurragak azpimarratu du aurtengo jaietan ez dela eraso matxisten edo bestelakoen salaketarik jakinarazi: “Ez dugu eduki eraso bat ere eta pozteko da. Giroa osasuntsua izan da”.