Urduritasunek, ilusioek, gainezka egin duten indarrek hartu zuten maiatzaren 31ko igandean Aldai Plaza. Hamasei izan ziren euren lanak aurkeztu zituzten taldeak, horietako bat lehiaketatik kanpo, Laudioko Koreografia Erakustaldiaren lehen edizioan.
Txalo, barre eta negarren baten artean Txitxarritak, ospakizunetako irakasle-pailazoak, parte hartzaileei eta ilusioaren konplize ziren ikusleei zuzentzen zitzaien. Lagun, senide eta auzokideek bete zuten karpa, laguntasun eta umore onez betetako giro batean.
Epaimahaiaren lana ez zen erraza izan. Horregatik, Txanik, Markelek, Koldok, Pekek eta Haizeak irabazlea hautatzen zuten bitartean, flamenko irakaslea den Luziak bere arte eta indarraz gozarazi zigun, diskodantzaren kamioiaren gainean.
Eta iritsi zen unea, erabakia. Talde irabazlea: Unknows, hiru neskek osatzen zuten: Ane Mirenek, Cheyennek eta Rakelek. Izugarrizko indarra zeukaten hiru “hiphopera”. Erritmoz betetako dantza bat egin zuten, talde-koordinazio handiarekin eta mugimendu garbi eta zuzenak baliatuz. Makillajeak euren aurpegien espresioa areagotu egiten zuen, indarrez betetako keinuekin.
Gozamena.
SOS Laudioko Lamuza Parkea plataformatik erakustaldira aurkeztu diren pertsona guztiei eman nahi dizkiegu eskerrak, lan guztietan jarri dituzten indar eta gogoengatik. Badakigu adin ezberdintasuna nabaria izan dela, baina egiten goazen heinean ikasten dugu. Ezer ez egitea da ezereza.
Bigarren edizioan kategoriak konpentsatuagoak egotea espero dugu. Denon artean pentsatuko dugu horretan, berdintasun gehiago lortzeari begira.
Zorionak Rakel, Cheyenne eta Ane Mireni merezita jaso duten sariagatik (Berlinera bidaia, hotel egonaldiarekin eta ikuskizun bat ikusteko sarrera batekin).
Lerro hauek aprobetxatu nahi ditugu gogorarazteko irailaren 12an zita bat dugula guk guztiok: “Atera zure artea parkera”. Egun hori erreserbatzera eta edozein ekintza kultural prestatzera animatu nahi zaituztegu.
Izan ditugun kolaborazio guztiek egin dute posible erakustaldia.