Aste Santuko oporrak izan direla eta, Laudioko Lateorro auzoko liburu-denda itxita egon da. Baina harritu ninduen ikusteak alboko tabernetan egunkariak salgai zeudela. Izozki hozkailu baten gainean zeuden kokatuta, hori ohiko erakustokia izango balitz bezala.
Tabernariak azaldu zidan neurri hori hartu zutela adineko jendean pentsatuta. Geltokiko tunelean lanak egiten ari dira eta igarobide hori itxita dago. Badugu beste tuneletik pasatzeko edo gaineko pasabideak gurutzatzeko aukera, baina adinekoak ohituta daude auzoan bertan, euren etxetik gertu, egunkaria erostera.
Herriaren beste aldera pasatzea, edo gehiegi ibiltzea, eragozpen bat izan zitekeen eurentzat. Denok dakigu zer diren errutinak: betiko tokian kafetxoa hartu, betiko tokian ogia erosi, betiko tokian egunkaria eskatu... Ohiturak edo errutinak aldatu beharko bagenitu, moldatuko ginateke, baina askok nahiago dute mantentzea.
Tabernan prentsa saltzea alternatiba txukuna eta erosoa iruditu zitzaidan. Baina egunkaria irakurtzeko behar hori egiaztatzea izan zen gehien gustatu zitzaidana. “Guardiako kiosko” hori han zegoen badaudelako oraindik pertsona asko prentsa erosteko ohiturari eutsiko diotenak.
Kazetaritzaren heriotzaren berria maiz izan dugu, idatzizko prentsaren hileta iragarri da maiz, baina, ostiral santu horretan alaitu ninduen ikusteak kazetaritzak bizirik zirauela izozki hozkailu baten gainean.