Geure lana ahalik eta hoberen betetzea gauzarik normalena izan beharko litzateke. Hala eta guztiz ere, denok dakigu profesional onak eta ez hain onak daudela. Ez da arruntena bere lana maite duen pertsona bat topatzea gaur egun. Horregatik, Laudion zorte handi izan genuen Patriciarekin. Bera herriko liburutegian aritu da azken urte hauetan. Patricia liburuzaina deitzen genion aspaldi.
Irribarretsua eta adeitsua, beti egon da laguntzeko prest. SOS Parkean kolaboratzaile, adibidez. Modu berean, liburutegi handiago eta hornituagoa nahi zuen laudioarrentzat. Bestalde, hainbat eta hainbat ekitaldi kultural antolatu ditu, eta liburutegia liburuak aurkezteko leku aproposa dela gogorarazi zigun liburuzain honek. Gainera, laudioarrok idatzi ditugun liburuen digitalizazioari ekin dio ilusioz.
Patriciak Laudioko liburutegiak zituen liburuak zaindu eta handitu ditu, ahal zuen neurrian erabiltzaileen iradokizunak haintzat hartzen.
Gasteizera joango da orain Patricia lanera; eta faltan botako dugu, bai helduak garenok, eta baita haurtxoek ere. Faltan botako dugu bere adeitasuna, bere eraginkortasuna eta, batik bat, bere berotasuna. Ilusioa transmititzen zigun Patriciak, eta eskertzekoa da hori, kultur mundu honetan ilusioa maiz galtzen baita. Ilusioa eta liburuarekiko maitasuna: hori da herriko liburutegian jasotzen genuena hara jotzen genuen bakoitzean.