aiaraldea.eus

[IRITZIA] Politikaren porrota

Erabiltzailearen aurpegia Txema Urkijo Azkarate   Jendartea

Azken urteetan asko handitu da -sustatu da- Espainiaren aurkako sentimendua Katalunian, eta Kataluniaren aurkakoa Espainian. Mespretxua eta elkarrekiko gorrotoa sumatu daiteke bi jendarteen sektore zabal batzuetan.

PPko zuzendaritzaren, PSOEko agintari batzuen zein kataluniar independentismoaren zati handi baten arduragabekeria erabakigarria izan da aipatutako sentimendu horiek politika zehatzetan aplikatzerako orduan. Elkarrizketa nahi eta eskaintzen zutela saldu dute, komeni zitzaien konfrontazioa onartu eta sustatzen zuten bitartean. Eta horrela iritsi gara gaur egungo egoerara.

“Zuek trikornioak jartzen dituzue eta guk hautetsontziak”. Hori da gaur egungo eztabaida politikoaren maila. Penagarria, demagogikoa, didaktikarik gabekoa eta haserrea eta tentsio soziala sustatzen duena bi aldeetan, zoritxarrez handiagotzen joango den tentsioa.

Politikaren eta demokraziaren porrota da gaur Katalunia. Askatasunak sufritzen du. Espero dezakegun gauza bakarra da egun hauetako aurre-kanpainak eta erreferendumaren porrotak sortuko duen frustrazioak ez ekartzea gauza okerragorik. Arrazoi nahiko eman ditugu euskaldunok Espainiako gainontzeko tokitan gaizki baloratu gaitzaten, baina askoz gutxiago estimatzen dituzte katalanak. Paradoxa arraroa. Urriaren 2an dago itxaropena.

Erantzunak

Erabiltzailearen aurpegia Aitor Martinez Ibarrola Erantzuna | #1

1) "Azken urteetan asko handitu da -sustatu da- Espainiaren aurkako sentimendua Katalunian, eta Kataluniaren aurkakoa Espainian. Mespretxua eta elkarrekiko gorrotoa sumatu daiteke bi jendarteen sektore zabal batzuetan."

-Katalunian orokorrean estatu espainiarraren aurkako gorrotoa zabaldu da, eta ondo justifikatuta azkeneko egunotako gertakariekin. Espainian, ordea, katalanen aurkako gorrotoa zabaldu da. Esango nuke agerikoa dela desberdintasun kualitatiboa, baina zuk, ustez neutraltasunetik begiratzen duen horrek, ez du hau ulertzen. Zure neutraltasuna agerian geratuko da, ordea, hurrengo parrafoan.

2) "PPko zuzendaritzaren, PSOEko agintari batzuen zein kataluniar independentismoaren zati handi baten arduragabekeria erabakigarria izan da aipatutako sentimendu horiek politika zehatzetan aplikatzerako orduan."

-PPko zuzendaritza, gaizki; gutxi batzuk. PSOEko agintari batzuk, gaizki; are gutxiago. Kataluniar independentismoaren zati handi bat, gaizki. Hauek ez dira gutxi, hauek milioika katalan dira. Beraz, 30 espainiar gaizki; milioika katalan gaizki. Zuzendaritzak eta alderdi egiturak gaizki; independentismoa, mugimendu bat, aldarri politiko bat, gaizki. Nahiko agerikoa da zure demagogia, beste batzuei halakorik leporatzeko. Eta kasu, honekin ez dut nire iritzia ematen independentismoaren inguruan, asko luzatuko nintzateke hartarako. baina agerian geratzen da ustezko neutraltasunean benetan intentzio bat dagoela, kasu honetan nahiko zatarra, gainera.

3) "“Zuek trikornioak jartzen dituzue eta guk hautetsontziak”. Hori da gaur egungo eztabaida politikoaren maila. Penagarria, demagogikoa, didaktikarik gabekoa eta haserrea eta tentsio soziala sustatzen duena bi aldeetan, zoritxarrez handiagotzen joango den tentsioa."

-Ez dut uste eztabaidaren mailaz hitz egiteko egoera onenean zaudenik, egia esan. Baina kezkatzekoa dena ez da horrenbeste eztabaida horren maila, eztabaida hori ematearen arrazoia baizik. Hau da, katalanek galdeketa bat egin nahi dute haien gobernuak erabakita, eta espainiar gobernuak trikornioak bidaltzen ditu trukean. Esango nuke penagarria dena espainiar gobernuaren erantzuna dela. Hau da, zuk diozu hori eztabaida politiko bat dela; nik ezetz diotsut, ezkutatu nahi baduzu ere, hori ez dela ideien talka hutsa, hori errealitate gordina dela, trikornioak kataluniatik paseatzen ari direla. Eta oso penagarria da, bai. Gainera tentsioa handiagotzen joango dela diozu; jakina, estatu espainiarrak indarrez zapaltzen badu katalanen borondatea, tentsioak soilik handiagotzera joko du. Izan ere, zuretzat soluzioa dena berdin mantentzea da, edo akaso negoziazioari ekitea dena berdin mantentzeko, arazoa bera dena berdin mantentzea denean. Beraz, argi eta garbi, zuretzat arazoa katalanak dira, dena berdin mantentzea nahi ez dutelako.

Eta 4) "Politikaren eta demokraziaren porrota da gaur Katalunia. Askatasunak sufritzen du. Espero dezakegun gauza bakarra da egun hauetako aurre-kanpainak eta erreferendumaren porrotak sortuko duen frustrazioak ez ekartzea gauza okerragorik. Arrazoi nahiko eman ditugu euskaldunok Espainiako gainontzeko tokitan gaizki baloratu gaitzaten, baina askoz gutxiago estimatzen dituzte katalanak. Paradoxa arraroa. Urriaren 2an dago itxaropena."

-Politika eta demokraziaren porrotarekin, ados. Esango nuke politika eta demokrazia burgesaren porrota direla, kapitalismoan demokrazia bera porrota da ezinbestean. Erreferendumaren porrotaz hitz egiten duzu, barne gaitasun ezak sortuko balu bezala. Erreferenduma geldituko bada ez da izango bere porrotaren ondorio, estatuaren bortizkeriaren ondorio baizik. Espero duzu porrot horrek frustraziorik ez ekartzea, oso sentibera zu, porrota espero duzun bitartean, hau da, estatuaren interbentzio bortitza galdeketa gelditzen. Batzuen zinismoak ez du aurrekaririk; deabrua aingeruaren katamaloa jarrita.

Bukatzeko, euskaldunon inguruan botatzen duzuna ZURE KOROATZEA da. Testua hasi duzu zure bihotz ona erakutsita, neutraltasun faltsu batetik, elkarren arteko gorrotoa zein tristea den adierazi nahian. Orain diozu euskaldunok arrazoi nahiko eman ditugula gorrotatuak izateko. "Penagarria, demagogikoa."

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa