Udal zerga hori deskontatzeak, martxoaren erdialdetik urte amaierara arte, 2.000 euro inguruko kostea suposatuko du udalarentzat. Neurri honen bidez, COVID-19a dela eta ostalaritza establezimendu eta zerbitzuetan ezarritako segurtasun-neurrien ondorio ekonomiko negatiboak -hala nola, edukiera murriztea eta ordutegiak mugatzea- arintzen lagundu nahi da.
Ekainaren 23an gauzatutako ohiko osoko bilkuran, alarma-egoeraren ondorioz eskaini ezin izan ziren prestazioekin lotutako zenbait udal-tasa etetea eta itzultzea onartu zen irailaren 30era arte; besteak beste, terrazak instalatzeko erabilera publikoko lursailaren okupazio-tasen eta estolderia eta zabor-bilketa tasaren zati proportzionala.
Udalaren beste ekintza batzuk
Urduñako ostalaritza eta txakolinaren sektorea babesteko eta sustatzeko, "Gilda & Txakoli" kanpaina gastronomikoa eskainiko da udalerrian 2020ko larunbat, igande eta jaiegun guztietan. Ekimena Udaleko Ekonomi Sustapen Sailak jarri du martxan uztailaren 24an.
Kanpainarekin bat egin duten establezimenduek Bizkaiko gilda eta txakolina eskaintzen dituzte 2,20 euroko prezioan. Ekintza honen bidez, lurrarekin lotura estua duten eta tokiko ingurunea identifikatzen duten bi produktu ezagutarazi eta horien kontsumoa sustatu nahi da.