COVID-19 birusaren bigarren olatua dela eta, urduñarren erantzukizuna eta sen ona arren eskatu du Udalak alkatetza-bando baten bidez, udalerrian birusa gehiago ez zabaltzeko helburu nagusiarekin.
Udala Osakidetzarekin harremanetan jarri da azken kutsatzeen larritasuna aztertzeko. 100.000 biztanleko 584,93 kutsaturen ratioa du hiriak, hau da, ‘alerta gorria’ egoeran jarraitzen du Urduñak.
Kutsatze horiek geldiarazteaz harago, deialdi kolektibo horren helburuetako bat da, hain zuzen ere, osasun-zentroetako eta ospitaleetako lan-karga saihestea. Urduñaren kasuan, hirian langile gehiago kontratatzea beharrezkoa dela jakinaraziko zion udalak Osakidetzari.
Osasun-gomendioei jarraituz, tokiko erakundeak herritarrei eskatu die beharrezko prebentzio-neurriak betetzea –distantzia sozialari eustea, maskara erabiltzea eta eskuak maiz garbitzea– eta sukarra, eztula edo aire-faltaren sentsazioa bezalako sintomak izanez gero, etxean geratzea eta Osasun Zentroarekin (945 38 35 53) harremanetan jartzea.
Kontaktu estuek aztarnarien deia jaso arte itxaron behar dute etxean; haiek adieraziko diete zer prozedura jarraitu behar duten. Baieztatutako COVID-19 kasuek nahiz harreman estuek isolamenduan egon behar dute Osakidetzak hala adierazi arte.
Udal laguntza sarea
Era berean, udal laguntza sarea dagoela gogorarazi du Udalak, eta bertara jo daitekeela erosketak egiteko edo zaborra ateratzeko laguntza behar izanez gero. Boluntario talde honekin harremanetan jartzeko, 625 258 139 telefono-zenbakira deitu ahal da.
Urduñako Udalak, bere aldetik, antolatutatako ekintzak zein udal-instalazio eta -lokaletan indarrean dauden protokoloak berrikusiko ditu –udaletxea, Alondegia eta Kale Nagusiko 10. zenbakiko irakaskuntza-zentroa–, nahiz eta Eusko Jaurlaritzak ezarritako araudia zorrotz betetzen duten. Osakidetzak emandako aholkuekin bat etorriz, gehieneko edukiera eta aireztapen egokia izango dute ardatz, "berebiziko garrantzia" baitute.