Udalerriko gazteen emantzipazio-prozesua bultzatzeko, sustatzeko eta suspertzeko helburuarekin, 18 eta 35 urte bitarteko gazteei etxebizitza alokatzeko diru-laguntzak emango ditu Urduñako Udalaren Gizarte Ongizate Sailak. Horretarako, 10.000 euroko aurrekontua ezarri da.
Diru laguntza eskatzeko epea azaroaren 26an amaituko da. Eskabidea Urduñako Udalaren egoitza elektronikoaren bidez (urduna.com/ Tramiteak) aurkeztu beharko da; edo, paperean, Udaleko Sarrera Erregistroan: Kale Zaharra 2-4, 9:00etatik 13:30era, astelehenetik ostiralera.
Diruz lagunduko den gehienezko zenbatekoa alokairu-gastuaren %50ekoa izango da; eta gehienezko muga, hilean 100,00 eurokoa eskabideko.
Laguntzak 12 hilabete iraungo du gehienez; epealdia 2021eko urtarrilaren 1ean hasi eta abenduaren 31n amaituko da.
Honako hauexei dagozkienak ez dira diruz lagundu daitekeen gastutzat hartuko: garajeak, erkidegoko eta administrazioko gastuak eta kontribuzio zein ariel moduan sortutakoak, kasuan kasuko kontratuan berariaz agertzen badira ere.
Baldintzak
Laguntza hauetako onuradunek ezin izango dituzte diru-sarreren zenbateko hauek gainditu:
A. Urteko 23.000,00 euro gordin (eskatzaile bakar bat badago).
B. Urteko 32.000,00 euro gordin (bi eskatzaile edo gehiago badaude).
Banatuen edo dibortziatuen kasuan, diru-sarreren guztizko zenbatekoa kalkulatzeko, semealaben mantenuagatiko pentsioaren zenbatekoak kenduko dira, baita hileko hipoteka-kuoten zenbatekoa ere, egon baleude.
Oinarri guztiak udal webgunean irakurri daitezke.