Zenbait aldaketa onetsi ditu Urduñako Udalak udal zerga batzuetan, eta 2022ko urtarriletik aurrera egongo dira indarrean. Trakzio Mekanikoko Ibilgailuen gaineko Zergan eta Eraikuntza, Instalazio eta Obren gaineko Zergan aplikatuko dira, hain zuzen.
Instalazio, eraikuntza eta obrak
Eraikuntza, Instalazio eta Obren gaineko zergaren kasuan, hainbat hobari onartu dira. Abiapuntutzat hartu da Hirigune Historikoa Birgaitze Orokorreko Eremuaren barruan dagoenez, zerga hori %1ekoa dela bertan, eta kanpoko eremuetan, berriz, %5ekoa. Horrenbestez, eremu zaharretik kanpo baino ez dira aplikatuko zerga honi dagozkion hobariak.
Esaterako, %95era arteko hobaria eman ahalko da enpresa-jarduerak ezartzeko, hobetzeko edo zabaltzeko obrak egiten direnean, enpresa berriak izan ala ez. Jarduera ekonomikoari zuzenean atxikitako langile kopuruaren arabera aplikatuko zaio hobaria zerga honi, betiere udalerrian kokatutako enpresak baldin badira.
Hobari hori jasotzeko, establezimendu berri batean edo aurretik irekitako batean, lan-kontratua duten lanpostuen kopurua honako hau izan beharko da:
- Langile 1etik 2ra: kuotaren %25eko hobaria.
- 3 eta 4 langile artean: kuotaren %45eko hobaria.
- 5 eta 10 langile artean: kuotaren %65eko hobaria.
- 11 eta 19 langile artean: kuotaren %85eko hobaria.
- 20 langile edo gehiago: kuotaren %95eko hobaria.
Bestalde, %30eko hobaria emango zaie Hirigune Historikotik kanpo dauden eta lehen aldiz igogailua instalatuko duten etxebizitza-komunitateei, bai eta irisgarritasun-baldintzak hobetzeko edo atarietako zutabe arkitektonikoak kentzeko obrak egingo dituztenei ere.
Eraikuntzaren energia-eraginkortasuna hobetzeko obretan, hobaria %30era artekoa izango da. Kasu horietan, A letrako adierazle globala lortzen badute, %30 aplikatuko da. B letrara iristen diren jarduketek, ordea, %20ko hobaria izango dute; C letrara heltzen badira, %15ekoa; eta, azkenik, D letraren hobaria % 10ekoa izango da.
Azkenik, %30eko hobaria lortu ahal izango da eguzki-energiaren aprobetxamendu termiko edo elektrikorako sistemak instalatzen direnean, indarrean dagoen araudi teknikoagatik nahitaez ezarri behar diren kasuetan izan ezik.
Trakzio mekanikoko ibilgailuei buruz
Trakzio mekanikoko ibilgailuen gaineko zergan, garraiobide iraunkorrenen aldeko aldaketa egin da. Motor hibridoko ibilgailuek eta gas naturala, petrolioaren gas likidotuak edo bioetanola erregai gisa erabiltzen dutenek %50eko hobaria izango dute. Motor elektrikoa dutenek, aldiz, hobari handiagoa izango dute, zehazki, kuotaren %75.
Amaitzeko, azpimarratzekoa da antzinako ibilgailuak sustatzeko eta hedatzeko hobariaren beherakada. 25 urtetik gorako ibilgailuen hobaria %100etik %50era jaistea erabaki dute.