Otxomaioen ospakizuna amaitu eta gero, Urduñako Udalak lehenengo balorazio positiboa egin du. David Gutiérrez Martínezek, Kultura eta Jai Saileko zinegotziak, honako hau azpimarratu du: “Giro ikaragarria egon da, eguraldiak lagunduta. Bi urte forma arruntean ospatu ezin eta gero, jendea oso gogotsu zegoen eta parte-hartzea ezin hobea izan da”. Era berean, Udalak jakinarazi du jaietan ez dela eraso matxistarik salatu.
Herritarren parte-hartzea aktiboa izan da 2022ko Otxomaioen adierazgarria. Gutierrezek azaldu duenez, “lehenengo larunbatean 43 tortilla eta 36 paella aurkeztu zituzten lehiaketara eta igande honetan, putxera lehiaketa berria izanda, 87 putxera kozinatu dituzte”. Musika eta COVID-19aren aurreko jai giroa ere ez dira falta izan. “Kontzertuetan enparantza beteta egon da; azken batean, primerako Otxomaioak izan dira”, adierazi du zinegotziak.
Gutierrezek eskerrak eman nahi dizkie Jai Batzordeari eta jai-ekitaldietan parte hartzen duten kultura-, kirol- eta gastronomia-talde eta elkarte guztiei, bai eta jaiak antolatzen eta garatzen interesik gabe lagundu eta lan egin duten pertsona guztiei ere.
Auzotarren balorazioa
Tokiko elkarteek, udal ordezkariek eta Udaleko teknikariek osatzen duten Otxomaioko Jai Batzordeak Urduñako herritar guztiek ospakizunen balorazioan parte hartzea nahi du.
Hori dela eta, bizilagunak iradokizunak egitera gonbidatzen dituzte, zikoina@urduna.com helbidera idatziz, Hirix plataformaren bidez mezua bidaliz edo Alondegian horretarako jarritako orrietako bat betez. Beste behin ere, egindako ekitaldiei eta jaiekin lotutako bestelako gaiei buruzko proposamenak eta balorazioak jasoko dira: aisialdiko eskaintza, kokapena, ordutegiak, etab. Halaber, datozen urteetarako ideiak onartuko dira.
Datorren jai batzordean egingo dute Otxomaioen ebaluazio orokorra, bizilagunen ekarpenak ere kontuan hartuta.