Saratxoko saihesbidea eraikitzeko obrak amaitu ondoren, Urduñako alkatea eta Obra eta Zerbitzuetako zinegotzia, Itziar Biguri Ugarte eta Juanjo Sanz Pérez, Jon Larrea Arrutia Berrikuntzarako eta Bide Kudeaketarako zuzendariarekin bildu dira ekainaren 21eko goizean, BI-625 errepidearen zati berriaren arriskugarritasuna aztertzeko.
Bilera horretan aztertutako gaietako bat udal igerilekuen eta La Muerako erdigunearen parean dagoen bazterbidea izan da. Foru Aldundiak adierazi du horren berri duela eta ekintza bat planteatu dutela hori konpontzeko. Hain zuzen ere, bazterbidea Saratxotik datorren errepidearen zabalera berera zabaltzea aurreikusten dute, belar-sastrakak kenduz eta lur-erauzketa txiki bat eginez, bai ezkerraldean, bai eskuinaldean. Lan horiek uztailean amaitzea da aurreikuspena.
Udalak, bere aldetik, bazterbidearen egoeraren berri emateaz gain, konponbidea ahalik eta lasterren bilatzeko beharra azpimarratu du, udan biztanle asko hurbiltzen baitira udal igerilekuetara.
Ildo horretan, seinaletika edo bestelako elementuak jartzeko eskatu dute, autoen abiadura moteltzeko helburuarekin, tarte arriskutsua baita, udan igerilekuetan aparkatutako auto asko daudelako. Etorkizunari begira, Udalak Aldundiari eskatu dio beste lanen bat burutu dezala, bide seguruagoa izan dadin.
Bestalde, Udalak gogorarazi du duela bi urte Bizkaiko Foru Aldundiak adabakia jarri zuela Belandiako errepidean, baina tarte bat amaitu gabe geratu zela. Horri dagokionez, tokia berraztertzeko konpromisoa hartu du Aldundiak, aurten ez bada, datorren ekitaldian.