Urduñako irabazi-asmorik gabeko kultura-elkarteek hilabeteko epea dute, joan den larunbatetik, udalaren kultura arloko dirulaguntzak eskatzeko. Eskaerak aurkezteko azken eguna ekainaren 28a izango da.
Diruz lagundu ahal izango diren proiektuak mota guztietakoak izan daitezke (antzerkia, musika, ondarea, jaialdiak edo tradizioarekin lotutako jarduerak, besteak veste), betiere herritar guztientzat irekiak badira eta 2026an zehar Urduñan garatzen badira.
Udalak laguntza ekonomikoa emango du, baina ez du jardueren antolaketan parte hartuko. Elkarteek izango dute ekimenen protagonismoa eta erantzukizuna, eta Udalak finantzaketa osagarria eskainiko du. Ez da proiekturik izango gastu guztien %100ean diruz lagundua.
Nork eska ditzake laguntzak?
Dirulaguntzak eskatu ahal izango dituzte Urduñan egoitza duten kultura-elkarteek, baldin eta Eusko Jaurlaritzaren Elkarteen Erregistroan inskribatuta badaude eta haien estatutuak zein IFK aurkeztuta badaude eskaerak aurkezteko epea amaitu aurretik.
Horrez gain, ezinbestekoa izango da Ogasunarekiko, Gizarte Segurantzarekiko, Foru Aldundiarekiko eta Udalarekiko betebeharrak egunean izatea, bai eskaera aurkezteko unean bai dirulaguntza kobratu arte.
Kanpoan geratuko dira sexu-arrazoiengatiko diskriminazioagatik zigortutako erakundeak, baita emakumeen eta gizonen arteko berdintasun-printzipioaren aurka jarduten dutenak ere.
Zer finantzatzen da eta zer ez?
Deialdia herritar guztiei irekitako kultura-proiektuak sustatzeko sortu da. Horregatik, ez dira diruz lagunduko elkarteko bazkideei soilik zuzendutako jarduerak, izaera hutsean festiboa duten ekimenak edo elkartearen helburuekin loturarik ez duten jarduerak.
Era berean, kanpoan geratuko dira 600 eurotik beherako aurrekontua duten proiektuak, 15 pertsona baino gutxiagori zuzendutakoak eta beste bide batzuetatik finantzaketa jasotzen dutenak. Jardueraren gehienez %50 azpikontratatu ahal izango da.
Nola aurkeztu eskaera?
Eskabideak Urduñako Udalaren egoitza elektronikoaren bidez aurkeztu beharko dira (www.urduna.com, Izapideak atalean), horretarako prestatutako eredua erabiliz eta eskatutako dokumentazioa PDF formatuan eta sinadura elektronikoarekin erantsita.
Halaber, Administrazio Prozedura Erkidearen Legeak aurreikusitako gainerako bide ofizialak ere erabili ahal izango dira.
Dirulaguntza jasotzen duten elkarteek 2027ko urtarrilaren 31ra arte izango dute gastuak justifikatzeko epea. Horretarako, jardueraren aurrekontu osoaren %100 justifikatu beharko dute, eta ez soilik Udalak emandako diru-kopurua.
BDNS 906915 zenbakia duen deialdia osorik kontsulta daiteke Dirulaguntzen Datu Base Nazionalean (www.infosubvenciones.es).