Dendak, ostalaritza, zerbitzuak, enpresak eta profesionalak Urduñako eguneroko pultsuaren parte dira. Orain, sare ekonomiko horrek beste urrats bat eman du norabide argi bati jarraituz: aukera berriak sortuko dituen eta dinamikoagoa eta erakargarriagoa izango den hiri bat eraikitzea. Ahalegin guzti horretatik sortu da Urduña Bizi, hiriko Merkatarien Elkarte berria.
“Udaletik prozesu guzti honekin lagundu diegu, eta ildo horretatik jarraituko dugu, hiri bizi, dinamiko eta erakargarri bat guztion artean eraikitzen delako”, aurreratu du Iker Santocildes alkateak. Izan ere, kolektibo berri honen bokazioa Urduñako eragile ekonomikoen artean indarrak batzea da, aukera berriak sortuz eta hiriko merkataritza eta enpresa jarduera indartuz.
Gauzak horrela, eta behin elkartea sortuta, kideek lehen bilera ofiziala egin zuten atzo arratsaldean Alondegian, eta gaur elkartea alkatearekin bildu da etapa berri honen hasiera markatuko duten helburuak, lan ildoak eta lehen ekimenak partekatzeko.
“Urrats garrantzitsua da hau tokiko sare ekonomikoa indartzeko, bai eta elkarrekin lan egiteko jarduera handiagoa, aukera gehiago eta bizitza eta dinamismoa erakartzeko gaitasun handiagoa duen Urduña baten alde”, gogorarazi du Santocildesek.
Zentzu horretan, Udalak proiektuarekin bat egitera animatzen ditu hiriko eragile ekonomikoak, lankidetza egonkorrerako gune bat sendotu eta sinergia berriak sortzeko Urduñaren mesedetan.