Igande honetan, hilak 5, Urduñak zinema eta ikus-entzunezko sorkuntzaren mundura hurbiltzeko aukera izango du, Pablo Berger zuzendariaren eta Ibon Cormenzana ekoizle zein Urduñako Casa Mundo Cero elkartearen sustatzailearen eskutik. Solasaldia, “Ekoizle/zuzendari binomioa, Ibon Cormenzana eta Pablo Bergerrekin. Blancanieves-etik Robot Dreams-era” izenburupean, publikoari irekia izango da, 17:00etatik aurrera Alondegian.
Beren esperientziatik abiatuta, bi profesionalek Blancanieves-etik Robot Dreams-era arteko bide partekatua egitera gonbidatuko dituzte hiritarrak, hainbat gai jorratuz: zuzendariaren eta ekoizlearen arteko harremana, film baten atzean dagoen sormen-prozesua, istorio baten eraikuntza edota ikus-entzunezkoen industriak gaur egun dituen erronkak. Izan ere, Iker Santocildes alkatearen ongietorri instituzionalaren ondoren solasaldi irekia egingo da, bertaratutakoek galderak egin eta gogoetak partekatu dezaten.
“Urduñak ideiak, sormena eta talentua hazteko lekua izaten jarraitzea nahi dugu. Pablo Berger eta Ibon Cormenzana bezalako profesionalen presentzia aukera aparta da gure hiritarrak inspiratzeko, eta hiriak kulturarekin zein ikus-entzunezko sektorearekin duen lotura sendotzen jarraitzeko”, nabarmendu du Iker Santocildes alkateak.
Sormen-prozesuaren eta ikus-entzunezkoen industriaren gakoak publikoari hurbiltzeaz gain, Udalaren laguntzarekin Urduñan bultzatutako Casa Mundo Cero egitasmoa ezagutarazteko ere balioko du saioak. Ekimen honen helburua da kultura, talentua eta eragin soziala proposamen berritzaileen bidez konektatzea, sektoreko erreferenteak hiritarrei hurbiltzea eta aukera berriak sortzea udalerriko sormen- eta kultura-garapenerako.
