María Dolores Madaria eta Landatas auzoetako birgaitze integraleko eta hiri-berroneratzeko obrak amaitu dira dagoeneko. 8.629.328,77 euroko inbertsioari esker, hamar eraikin osorik zaharberritu dira: lau Landatasen (Landatas auzoa 1, 3, 5 eta 7) eta sei María Dolores Madarian (María Dolores Madaria 1, 3, 5 eta 7, Kale Nagusia 3 eta Antiguako pasealekua 6); guztira, 130 etxebizitza.
“Jarduera horri esker, errealitate desberdinak dituzten baina helburu bera duten gure hiriko bi auzoren aldarrikapen historikoari erantzun ahal izan zaio: bizilagunen egunerokotasuna eta bizi-kalitatea hobetzea”, aurreratu du Iker Santocildes alkateak. Hain zuzen ere, eta helburu komun horretan aurrera egiteko, alde batetik, eraikinen energia-eraginkortasuna hobetu da fatxadetan SATE sistemen bidez isolamendu termikoa jarriz, eta, bestetik, horietako zortzitan irisgarritasun-obrei ekin zaie, igogailuen instalazioarekin.
Proiektua BERPIZTU Programaren eta Aiaraldea Eskualderako Berehalako Jarduera Planaren barruan kokatzen da, eta Eusko Jaurlaritzak (2.135.908,13 €), Next Generation EU funtsek (3.773.809,53 €), Urduñako Udalak (531.833,11 €) eta bi auzoetako bizilagunek (2.187.778 €) finantzatu dute.
“Gaur obra hauek amaitzeaz gain, beste urrats bat eman dugu gure auzoak zaintzeko eta auzokideen bizi-kalitatea hobetzeko konpromisoari eusteko. Hori da proiektu honen benetako balioa. Ildo horretan, eskerrak eman nahi dizkiegu bizilagunei, obrak iraun bitartean erakutsitako pazientziagatik eta ulermenagatik. Jabetzen gara horrelako jarduera batek eguneroko bizitzan sor ditzakeen eragozpenez, eta bizilagunek erakutsitako konpromisoa baloratzen dugu”, azpimarratu du alkateak.
Hiri birgaitzea
Bi auzoetako eraikinetan esku hartzeaz gain, bi auzoetako espazio publikoetan jarduteko ere balio izan dute lanek, baita Opengela izenez ezagutzen den Kudeaketa eta Hurbiltasuneko Bulego Teknikoa abian jartzeko ere.
Horiek horrela, Maria Dolores Madariaren inguruan Antiguako pasealekua berriz urbanizatu da, galtzadaren eta espaloiaren arteko kotak berdindu dira, eta telekomunikazio-sareak lurperatu eta argiteria publikoa hobetu da. Landatas auzoan ere linea elektrikoak eta telekomunikaziokoak lurperatu dira, PGLko andelaren ordez gas naturala auzora iritsi da, trastelekuetarako sarbideak eta arrapalak hobetu dira, aparkalekuak birbanatu dira, hiri-altzari eta argiztapen berriak instalatu dira, eta erabilera komunitarioko kanpoko espazio estali bat sortu da.
“Jarduera honek erakusten du auzo bat eraldatzea ez dela soilik espazioak berritzea, baizik eta bertan bizi direnen ongizatea eta bizikidetza hobetzea”, adierazi du Santocildesek.