Urduñako Udalak prest du jada udazkeneko Bonu Denda kanpaina, irailaren 5etik azaroaren 30era bitartean egingo dena. Parte hartu nahi duten hiriko establezimendu eta negozioek uztailaren 1etik 24ra bitartean eman ahal izango dute izena (biak barne), herritarren arretarako bulegoan (Kale Zaharra 2).
Edonola ere, Udalak gogorarazi nahi du joan den udaberrian atxikitako establezimenduek ez dutela eskaera berririk aurkeztu beharko. Inskripzioa automatikoki berrituko baita udazkeneko deialdi honetarako, baja berariaz eskatzen ez bada.
Horiek horrela, udal-programak 5 euroko dirulaguntza emango du atxikitako lokaletan egindako 25 euroko erosketa bakoitzeko. Kontsumitzaile bakoitzak gehienez bi bonu erabili ahal izango ditu NAN bakoitzeko, eta gutxieneko gastua 50 eurokoa izan beharko da biak batera trukatzeko. Bonuak ezin izango dira eskudirutan trukatu, ezta transferitu ere.
Behin kanpaina amaituta, negozio eta establezimendu parte-hartzaileek abenduaren 18a baino lehen entregatu beharko dizkiote Udalari trukatutako bonuak eta salmenta-tiket bakoitzaren kopia. Epez kanpo aurkeztutako bonuak ez dira ordainduko.