Urduñako Udalak beste urrats bat eman du herriko zerbitzu publikoak hobetu eta udalaren ekonomia-kudeaketa indartzeko. Hain zuzen, atzo arratsaldean egindako ezohiko osoko bilkuran, 2025ean onartutako Ekonomia eta Finantza Planaren jarraipen-txostena aurkeztu da, eta argi gelditu da udal-kutxa ongi dabilela. Izan ere, datuek erakutsi dute Udalak goitik behera bete dituela foru-araudiak zehaztutako hiru helburuak: aurrekontu-egonkortasuna, gastu-araua eta zorpetze-maila.
Emaitza horiek lortzeko, ezinbestekoak izan dira ekonomia eta finantza planak berak jasotako neurriak; hain zuzen, 330.000 euroko inbertsio bati eta hori ordaintzeko maileguari uko egitea dakarren plana. Kutxaren erabilerak argi utzi du hartutako konpromisoak bete direla eta kudeaketa ekonomikoa sendoa eta zentzuzkoa dela; izan ere, urtea soberakinarekin eta oso zor txikiarekin amaitu da (finantza-sarrera ez-ohikoen % 9,15ekoa baino ez, legeak jartzen duen % 60ko mugatik oso behera).
Udal-kutxaren bilakaera onari esker, Udalak funtsezko zerbitzuak hobetzen jarraitu ahal izan du. Horren erakusgarri da gaur bertan onartutako 69.637,26 euroko inbertsioa, udalaren zahar-egoitzara bideratuko dena. Udalak berak pilatutako aurrezkiekin ordainduko diren lan horiei esker, zentroko instalazioak berrituko dira (ohe berriak erosiz eta bainurako aulkiak jarriz) eta oinezkoentzako sarrera bat eraikiko da, egoitzarako sarbidea erraztu eta, bide batez, bertako erabiltzaileen erosotasuna, irisgarritasuna, arreta-kalitatea eta ongizatea hobetzen laguntzeko.
Turismo-tasaren ezarpena
Era berean, behin-behineko argi berdea eman zaio Urduñako turismo-egonaldien gaineko zerga arautuko duen ordenantzari, Bizkaiko Foru Aldundiak onartutako foru-araudia ezarriz.
Gauzak horrela, 2027ko urtarrilaren 1etik aurrera, herriko turismo-ostatuetan gaua igarotzen dutenek zerga hori ordaindu beharko dute. Zerga kudeatzea, berriz, establezimenduen beren zeregina izango da, haiek arituko baitira bitartekari gisa diru-bilketan.
Ordenantza honek hotelei, pentsioei, turismo-apartamentuei, nekazalturismoei, aterpetxeei, kampingei eta turismo-erabilerako etxebizitzei eragingo die. Halaber, hainbat zerga-salbuespen jasoko ditu egoera bereziki zaurgarrian daudenak babesteko, baita osasun-, hezkuntza- edo gizarte-arrazoiengatiko egonaldiak babesteko ere.
Orain, behin-behineko onarpen honen ostean, testua jendaurrean egongo da 30 lanegunez, herritarrek erreklamazioak edo iradokizunak aurkeztu ahal izan ditzaten betiko onartu aurretik.