Amurrioko CC-Maestre taldea aurten hasiko da sub-23 mailan lehiatzen. Une honetan sei txirrindulari ditu, denak arabarrak
Albiste pozgarri batekin hasi da urtea eskualdeko ziklismoarentzat. Izan ere, Amurrio Txirrindulari Elkarteak sub-23 mailako taldea izango du, Maestre enpresak emandako babesari esker. Momentuz, taldean sei txirrindulari daude, denak ere 18 eta 20 urte bitartekoak: Aritz Sasiain, Galder Zurimendi, Mikel Erauzkin, Jon Lainz, Daniel Marquínez eta Galder Sasiain. Kirol-zuzendari lanetan, berriz, Sabino Sasiain eta Jesús Zurimendi arituko dira, Amurrio Txirrindularitza Elkartean ibilbide luzea egindako bi pertsona.
Aurtengo egutegiari dagokionez, taldea Lehendakari Sariko eta Euskaldun Sariko lasterketetan lehiatuko da, Espainiako Kopako lasterketaren batean, eta horretaz gain Euskal Herritik kanpoko probaren batera joateko asmoa ere azaldu du.
Taldeak xede argia du arduradunen esanetan: txirrindulari gazteak afizionatu-mailara pasatzea, kirolaz gozatuz eta emaitzengatik inolako presiorik izan barik, betiere kirola ikasketekin uztartuz.
Amurrio Txirrundulari Elkartetik adierazi dutenez, erakundeetara ere jo dute -aldundira eta udalera hain zuzen ere- zertarako eta bideragarritasun apur bat gehiago lortzeko eta proiektuaren etorkizuneko oinarriak sendoago ezarri ahal izateko. Izan ere, haien esanetan, proiektuaren helburua da soilik Arabako txirrindulariak izatea eta aldi berean txirrindulariek ikasketekin aurrera egin ahal izatea.