Aurtengo jaiak abuztuaren 30ean hasiko dira eta 8ra bitartean. Ramón Rey izango da pregoia irakurtzeko arduraduna, kirolaren alde egindako lana eskertzeko.
gainerako urteetan baino lehentxoago izango dira: abuztuaren 30ean hasi eta Arteko Andra Mariren egunean bukatuko dira, irailaren 8an hain zuzen ere. Betiko moduan, bi asteburutan pilatuko dira jaietako hitzordu nagusiak, nahiz eta aste barruan ere zenbait ekitaldi eta ikuskizun izango diren. Jaiak udalak antolatu ditu, jai-batzorderik sortu ez zelako.
Ohi bezala, lehenengo barikuan kuadrillak Goiko Plazan batuko dira 20:30ean zurrakapotea dastatzeko eta handik udaletxeko plazaraino joateko. Bertan, pregoia irakurriko da eta segituan txupina botako da jaiei hasiera ofiziala emateko. Aurtengo pregoia Ramón Reyk irakurriko du. Ramón urte asko eman ditu kirola zabaltzen herriko ume eta gazteen artean, eta gainera “artzikirol” izeneko kirolaren sortzailea da, azkenaldian gure inguruetara zabaltzen ari den kirol bat hain zuzen ere. Ondoren, Artziniegako lau pilotari ohiren arteko pilota-partidua jokatuko da, eta eguna Joselu Anayak berbena-talde mitikoaren emanaldiarekin amaituko da.
Zapatuak, berriz, hasiera gastronomikoa izango du eguerdian, pintxo-lehiaketarekin, eta jarraian indaba-jana egingo da 14:30ean. Bazkalosteari bertsolariek jarriko diote giroa. Arratsaldez dagoeneko klasikoak diren igel-toka eta bonbona eta garrafoi lasterketak egingo dira Goienkale inguruan. Musikari dagokionez, kuadrillen arteko playback txapelketa izango da seguru aski hitzordurik jendetsuena, eta ondoren Besos de Perro eta Haitzama taldeak arituko dira. Asteburu amaitzeko, domekan, besteak beste, poker-lehiaketa, Iturritik Iturrira izeneko kronoigoera eta artzikirol-erakustaldia izango dira hitzordu nagusiak. Dena dela, gure agenda-atalean ikusi dezakezue jai-egitaraua egunez egun.
Frontoiko txosnei dagokienez, aurten ere bi izango dira. Iazkoan lez, Arenaza kirol elkarteak eta Ganzorrotz mendizale taldeak jarriko dituzte.