Burdin Hesia mendi-lasterketa datorren domekan egingo da lehenengo urtez, Bilbo eta Laudio artean, 25 kilometroko ibilbide batekin. Euskara, kirola eta Burdin Hesiaren balore historikoa sustatu nahi dituzte antolatzaileek.
Euskal Herria Kirolak elkarteak, Euskarri Kirol Elkartearekin eta Laudioko eta Bilboko udalen laguntzaz lasterketa berri bat antolatu du ekainaren 30erako: Bilbo eta Laudio artean jokatuko den Burdin Hesia Mendi Lasterketa. Ibilbideak 25 km izango ditu eta inguruko mendi ezneagunetik igaroko da, Pagasarri, Ganekogorta eta Goikoganetik hain zuzen ere.
Antolatzaileek adierazi dutenez, proiektu honek hiru ardatz ditu: batetik, Euskal Herrian egiten diren mendi-lasterketa ugarien artean kokatzea. Bestetik maila guztietan eta bereziki kirolean euskara sustatzea. Eta azkenik, gure herrirentzat azpiegitura historikoa izan den Bilboko Burdin Hesiaren balorea zabaltzea. Hain zuzen ere, lasterkariak Gerra Zibilean Bilboko Hiria babesteko eraiki ziren lubaki, bunker eta zuloetatik igaroko dira. Ezin da ahaztu, gainera, mende luzez inguru horretako bideak asko erabiltzen zirela leku batetik beste joateko, hau da, Bilbo eta Laudio lotzeko
Gainera, lasterketak berezitasun bat izango du; izan ere, urtero norabidez aldatuko da. Hau da, aurten Bilboko Arriaga partetik abiatu eta Laudioko Lamuza parkera helduko bada, 2014an Laudio-Bilbo norabidean joango dira, beti ere ibilbide berari eutsita.
Dagoeneko ehun bat lasterkarik eman dute izena, eta oraindik ere parte hartzeko aukera dago www.kirolprobak.com helbidean inskripzioa betez.