Imanol Goñi natxituarrak eta Aitziber Ibarbia Zizurkildarrak nagusitasunez irabazi dute Amurrio Trail Lasterketaren II. edizioa. Okondoko Felipe Larrazabal Arabako txapelketan nagusitu da, sailkapen orokorrean lortutako 4. postuari esker.
>Euskal Kopako hirugarren probak ez du ustekabe handirik eman eta faborito nagusiak lehenengo postuan zeharkatu dute Juan de Urrutia plazako helmuga. Emakunezkoen mailan Aitzibier Ibarbia lehenengo kilometrotik aurrean jarri da eta hala eutsi dio Amurriora heldu arte. Guztira 2 ordu eta 53 minutu behar izan ditu 29 km-ko ibilbidea betetzeko. Haren ondotik Montse Vázquez eta Alizia Olazabal helmugaratu dira.
Gizonezkoei dagokienez, Euskal Kopako lider Imanol Goñik aurreikuspenak bete ditu eta besoak altxatuta zeharkatu du marra, 2 ordu eta 16 minutuko denborarekin. Beste pauso handi bat eman du Euskal Kopako sailkapen orokorrean lidertzari eusteko. Bigarren eta hirugarren postuak, hurrenez hurren, Endika Gartzia lasartearrarentzat eta Jabi Olabarria orozkoarrarentzat izan dira. Olabarria, hain zuzen ere, iazkoan irabazle izan zen, eta aurten Goñiri lau minutu falta izan zaizkio haren marka gainditzeko. Seguru aski ibilbidearen egoera -iaz askoz sikuago egon zen- zerikusia izan du horretan. Izan ere, ibilbidearen tarte batzuetan, batez ere Iturrigorritik Lendoñorainoko jaitsieran, lokatz dezente egon da.
Gaurkoan Arabako Mendi Lasterketen Txapelketa ere jokoan zegoen Amurrion, eta kasu honetan garaipena Okondoko Felipe Larrazabalentzat izan da, laugarren postua eskuratu baitu sailkapen orokorrean. Larrazabalengandik nahiko hurbil helmugaratu da Jon Lozano amurriarra. Hirugarren arabarra Zuiako Iñigo Urtaran izan da.
Lasterketa nagusiaz gain beste proba laburrago bat ere jokatu da, 12 kilometrokoa. Bertan, alde batetik, 21 urtetik azpiko kategorietako lasterkariak lehiatu dira, eta bestetik atleta herrikoiak. Euskal Kopako 21 urtetik azpikoan Laudioko Pello Morenok erraz irabazi du, eta nesken kategorian Leire Fernández Abeterentzat izan da garaipena. Geldiezina dirudi Errenteriako neskaren progresioa. Atleta herrikoien artean Aritz Ruiz Iturribarria eta Zuriñe Frutos artziniegarrak izan dira azkarrenak.
Maila handiko parte-hartzea izan da, beraz, gaur Amurrion langarra eta lokatzari aurre eginez, bai eta handia ere, guztira 200 lasterkari baino gehiago abiatu baitira irteera-puntutik.