Ekainaren 16an Jose Manuel Fernandez Arza “Josito” oroitzeko lasterketa jokatuko da Laudion. Josito Spiuk eta Kon Sport marken sortzailea zen eta oso ezaguna kirolaren munduan. Lasterketak 10 km izango ditu eta Zumalakarregin izango du irteera eta helmuga.
Laudioko Atletismo Taldeak José Manuel Fernández Arza “Josito” I. Memoriala herri-lasterketa antolatu du ekainaren 16rako Laudion. Josito iaz hil zen gaixotasun larri baten ondorioz eta lasterketa honen bidez haren lagun eta lankideek atletismoaren bultzatzaile sutsua eta Spiuk eta Kon Sport marken sortzaile izan zen gizona omendu nahi dute.
Ibilbideari dagokionez, 10 km-ko oinezko lasterketa izango da Laudioko kaleetan barrena. Irteera-puntua Zumalakarregi etorbidean egongo da; handik, herriguneari itzuli bat emango diote, Baia, Nerbioi eta Karmengo Ama kaleetatik, atzera ere Zumalakarregi etorbidera bueltatzeko eta Gardearako bidea hartuz. Gardeara heldutakoan, erreka zeharkatu eta Laudioko herriguneraino itzuliko dira, Jose Matia eta Bidezarretatik Aretaraino joateko. Handik, errepide nagusitik egingo dute Zumalakarregi etorbide helmugarainoko tartea. Guztira, esan bezala, 10 km-ko ibilbidea, marka politak egiteko oso aproposa.
Benetan goi mailako parte-hartzea izango da “Josito” Memorialean. Izan ere, punta-puntako hainbat kirolarik baieztatu dute Laudion izango direla: Eneko Llanos, Virginia Berasategi, Igor Astarloa, Inma Pereiro, Ana Burgos… Bertako korrikalariak ere maila ona emateko prest izango dira, tartean urtarrileko herri-lasterketan, zirkuitu berberean, zazpigarren postuan sailkatu zen Josu Apraiz laudioarra.
Izen-ematea 7 euroren truke egin daiteke www.kirolprobak.com web gunean. Dagoeneko 200 pertsonak baino gehiagok eman dute izena eta hortaz parte-hartze handia espero da.