Amurrioko Trail Taldeko korrikalaria bikain airtu zen larunbatean Leitzan, eta arinena izan zen Angel Arrieta irabazlearen ostean. Amurrioko beste 3 korrikalarik ere parte hartu zuten.
Denboraldi oparoa izaten ari da aurtengoa Gaizka Barañano Amurrioko mendi-korrikalariarentzat. Apuko Extrem eta Euskal Trails lasterketetan nagusitu ondoren (bigarrenean Txus Romonekin batera), atzo maila handia eman zuen Esaitek antolatutako Euskal Herria Mendi Erronka lasterketan eta 2. postua eskuratu zuen, 7 ordu eta 4 minutuko denborarekin. Leitzako irteeran batu ziren ia 500 lasterkariek 65 km bete behar izan zituzten eta 6.000 m-ko desnibela gainditu, Aralarreko punturik garaiena den Irumugarrietara mendira igota. Gainera, euripean egin zuten ibilbide gehiena, eta horrek probaren gogortasuna ahanditu zuen. Esan bezala, Angel Arrieta nafarra izan zen azkarrena helmugan (6:45:51), eta Gaizkaren ostean Iñaki Martiarena (7:13:40), Carlos Garcia Rekondo (7:20:19) eta Imanol Aleson (7:22:04) sailkatu ziren. Guztira 351 kirolarik bukatu zuten proba.
Txapelek aiaraldea.com-i egindako adierazpenetan esan digu “oso pozik” geratu dela emaitzarekin; “Zegama-Aizkorrin ez nintzen ondo topatu, ez nituen sentsazio onak izan eta zalantzatan negoen” izan dira bere hitzak. Leitzako lasterketaren garapenaz ere xehetasunak eman dizkigu: “Oso indartsu abiatu ziren 5 korrilakari, baina nik argineukan 30. km-ra arte astiro joan beharra zegoela. Puntu horretan 10. postuan nindoan eta hantxe hasi nintzen arinago; 42. kilometroan gutxi gorabehera 3. jarri nintzen, eta 50 kilometroa pasatuta bigarren posturaino heldu nintzen eta helmugaraino eutsi nion. Oso-oso pozik nago, ez nengoelako guztiz seguru eta gainera 5. kilometrototik aurrera molestiaren bat izan nuelako aduktorean”. Barañanorekin batera Amurrio Trail Taldeko beste hiru kide joan ziren EHMEra: Javi Laburu, Gorka Marañón eta Abel Fernández Mendibil.
Datozen hilabeteotan duen egutegiaz galdetuta, Txapelek esan digu hiru hitzordu nagusi dituela gorriz markatuta: Picos de Europako”Traveserina” ekainaren 16an, Gipuzkoako 2 Handiak uztailaren 12an eta Ultra Trail du Mont Blanc lasterketa mitikoa abuztuaren 30ean.