Proba Laudioko Goikogane Mendi Taldeak antolatu du eta Zaraobe institututik abiatuko da. Lizentzia indarrean duten mendizaleek hartu dezakete parte, banaka zein bi edo hiru kideko taldeetan.
Aurten Aiaraldeak hartuko du Euskal Mendizale Federazioak urtero antolatzen duen orientazio-ibilaldia. Ekainaren 2an izango da, igandea, Laudioko Goikogane mendi Taldeak antolatuta, eta Amurrioko Zaraobe institututik abiatuko da. Mota honetako probetan mendizaleek orientatzeko duten gaitasuna erakutsi behar dute, soil-soilik mapa berezi bat eta iparrorratz baten laguntzaz. Hala, lasterkariek mapan markatutako kontrol-puntuetatik pasatu behar dira, ezarritako hurrenkeran, eta bakoitzak erabakitzen du batetik bestera nondik joan.
Orientazio-ibilaldian banaka zein bi edo hiru laguneko taldeetan hartu daiteke parte. Irteera 8:30tik 9:30ra egingo da eta parte-hartzaileei ibilbidearen mapa, orri bat kontrol bakoitzari dagozkion koordenadekin, kontrol-txartela eta arautegia banatuko zaizkie. Izen-ematearen ordenan abiatuko dira eta antolakuntzak erabakiko ditu txandak. Iraupenari dagokionez, 2 eta 4 ordu bitartekoa izango da, eta kontrola 14:00etan itxiko da.
Izena emateko bi modu daude: nahi duenak Goikogane Mendi Taldearen egoitzan bertan egin dezake (Araba kalea 2, Laudio) astearte eta ostiraletan 19:00etatik 21:00etara, edo bestela www.zirkuitua.com web gunean dagoen formularioa betez. Izena emateko aurtengo federatu-lizentzia indarrean eduki beharra dago.
Antolatzaileek jakinarazi dutenez, probaren ostean bazkari bat egiteko asmoa dute, eta bertara joan gura duten parte-hartzaileek hala adierazi behar dute izena emateko orduan.