Apirilaren 27 eta 28an jokatuko den “challenge” lasterketa honen antolakuntza aritu da Aiala Txirrindulari Elkartea, Euskadi Fundazioarekin batera. Aurten, krisi ekonomikoa dela eta, egun bat gutxiago izango du eta hortaz ez da gure eskualdean etaparik jokatuko.
Asteburu honetan amateur mailako txirrindulariak Arabako errepideetan barrena lehiatuko dira, bosgarren urtez jarraian egingo den “Arabako Bi Egunak” lasterketan. Aurtengoan, eta izendapenean bertan ikusi daitekeenez, krisiak bere eragina izan du eta probak bi etapa baino ez ditu izango, aurreko urteetan hiru izan dituen arren.
Lehenengo etapa bihar jokatuko da Oion eta Bastida artean, Arabako Errioxan, eta bigarrena domekan Gasteizko inguruetatik joango den zirkuitu batean. Aurreko urteetan beti egin izan da etaparen bat Aiaraldean, baina egoerak hala behartuta, aurten txirrindulariak ez dira gure eskualdetik ibiliko. Horretaz gain, 2013ko nobedaderik handiena da taldekako erlojupekoa egingo dela bihar, Euskadi Fundazioak diziplina hori indartu nahi izan duelako, ez baitzegoen mota horretako probarik Arabako egutegian.
Aiala Txirrindulari Elkartea, gurean etaparik egon ez arren, eskuz esku aritu da Euskadi Fundazioarekin antolakuntza-lanetan, eta probak Arabako Foru Aldundiaren, Kutxabanken, El Correo eta Skodaren babesa izango du.
Parte hartuko duten taldeei dagokienez, ondorengoak izango dira: Naturgas Energía, Gipuzkoa-Eki Sport, Caja Rural, Hostal Latorre, Lizarte, Ibaigane Opel, Koplad-Uni 2, Reyno de Navarra, Seguros Bilbao, Debabarrena, Baque-Campos-Team eta Irolan Lanladi-Ordiziako.Guztira, ia 110 txirrindulari abiatuko dira.