Larunbat eta igandean Laudiok eta Artziniegak zirkuituko proba bana hartuko dute. Artziniegako Master Sariaren 1. edizioa izango da. Laudioko klasikoaren kasuan bosgarren urtez antolatu dute. Proba biak master zirkuitukoak dira, Araban zirkuitu horren barruan egingo diren probak bakarrak.
Asteburu honetan txirrindularitzak gure eskualdeko errepideak beteko ditu. Hasteko, bihar arratsaldeko 16:00etan Laudioko V. Master Klasikoaren txanda izango da. Lasterketa Zumalakarregi etorbidetik abiatuko da eta Gardea-Txirrita-Arakaldo-Areta zirkuituari lau buelta eman ostean, buelta luze bat egingo dute Luiando, Arespalditza, Okondo eta Garatetik Laudiora itzultzeko. Guztira 78 km bete beharko dituzte.
Artziniegako lasterketari dagokionez, Artziniegako Zaballa Txirrindulari Elkarteak antolatzen du eta aurten izango da lehenengo edizioa. Horretarako, 87 kilometroko ibilbide ikusgarria prestatu dute inguruko bideetan barrena. Artziniegatik abiatuta, bost buelta eman beharko diote Ureta-Satia-Lapetaratxe-Artziniega zirkuituari. Herriko txirrindulariek Lantenoko itzuli klasiko gisa ezagutzen dute ibilbidea. Ondoren, beste lau buelta Arteko santutegia-Mendieta-Ureta-Satia-Laperatatxe zirkuituari. Lasterketa Geltoki plazan amaituko da, 300 metroko aldapa piko baten ostean.
Esan bezala, bi proba hauek Arabako master zirkuituaren proba bakarrak izango dira. Master zirkuituan Estatu osoko senior eta beterano mailako txirrindulari federatuek hartzen dute parte, eta azken urteotan kategoria honek sekulako indarra hartu du. Maila handiko lasterketak ikusteko aukera izango da, beraz, abiatzen ari den denboraldi ziklistaren aurrerapen ezin hobea.