Abenduan herri-lasterketan izandako arrakastaren ondoren, Amurrioko Oinkariak Atletismo Taldeak beste kirol-ekitaldi bat antolatu du urte hasiera honetan, Amurrioko I. Krosa, hain zuzen ere. Igandean jokatuko da Juan de Urrutia parkeko zirkuituan, eta bertan Arabako Txapelketa ere jokatuko da.
Negua krosaren sasoia izaten da atletismo denboraldiaren barruan, eta Aiaraldean ere horretaz gozatzeko aukera izango dugu Oinkariak atletismo-taldeari esker. Izan ere, igande honetan lehen mailako krosa gurera etorriko da Amurrioko Krosaren I. edizioarekin; proba Amurrioko parkean jarriko den zirkuituan jokatuko da eta Arabako Txapelketa egiteko ere balio izango du.
Ez da Amurrion Arabako Txapelketa egiten den lehenengo aldia, baina bai Oinkariak antolatzen duen lehenengoa, eta baita ere Juan de Urrutia parkeko zirkuituan egiten dena, aurreko batzuetan Refor inguruan jokatu zelako. Oraingoan, zirkuitua nahikoa gorabeheratsua izango da, igoera eta jaitsiera askorekin, eta gogorra izango da lasterkarientzat. Aldi berean, beraz, espero daiteke ikusleentzat oso ikusgarria izatea, eguraldi euritsua iragarrita baitago.
Faboritoei dagokienez, Gasteizko La Blanca taldeko atletek 2012an Okondon lortutako arrakastak berritzen ahaleginduko dira (iaz Mohamed Afaadas izan zen nagusi), baina Oinkariak taldeko Pablo Masen esanetan “aiararrak aurre egiteko prest egongo dira”. Neskei dagokienez, Itxaso Escondrillas laudiarrak bere aukerak izango ditu. Probak goizeko 11etan hasiko dira, eta 14:00etara bitartean luzatuko dira, kategoria guztiak jokatu arte.