24 talde lehiatuko dira herriko kiroldegian jokatuko den goma gaineko 4x4ko sokatira txapelketaren bigarren saioan, tartean Artziniegako Bizindar. Arrigorriagako Sokarri, Abadiño eta Lesakako Ñapurrak dira faboritoak gizonezkoetan, eta Ibarrako taldea eta Gasteizko Badaiotz emakumezkoetan.
Duela bi aste Beasainen abiatu zen goma gaineko 4x4 sokatira txapelketa gurera etorriko da asteburu honetan. Iazkoan lez, herriko kiroldegiak hitzordu garrantzitsu hau hartuko du, arratsaldeko 17:30etik aurrera, eta guztira gizonezkoen 18 talde eta emakumezkoen 6 talde arituko dira bigarren saio honetan. Nesken taldeak 260 kilokoak dira, eta mutilenak 300 kilokoak.
Aurreko saioan Ibarrako nesken taldeak ezustekoa eman zuen, Gasteizko Badaiotz taldea mendean hartuta, eta lehia puri-purian egongo da beraz zapatu honetan. Artziniegako Bizindar taldeak bere zaleen aurrean onena emateko asmoz aterako da kantxara. Gizonezkoen kategoriari dagokionez, hiru multzotan banatuta lehiatuko dira, aurrekoan bezala, eta gero multzo bakoitzeko bi onenak sailkatuko dira finalerako. Arrigorriagako Sokarri, Abadiño eta Lesakako Ñapurrak dira faboritoak.
Artziniegako proban egingo den hautaketaren ostean, txapelketa datorren zapatuan erabakiko da Ibarran.